Saıasat Nurbek ǵylym salasyn tsıfrlandyrýdy qolǵa almaq

NUR-SULTAN. QazAqparat – Jańadan qurylǵan QR Ǵylym jáne joǵary bilim mınıstrliginde tsıfrlandyrý jónindegi vıtse-mınıstr laýazymyn ashý qarastyrylyp otyr. Bul týraly atalǵan vedomstvo basshysy Saıasat Nurbektiń QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń elektrondy qyzmet jumysymen tanysý barysynda belgili boldy, dep habarlaıdy QazAqparat.

«Bizdiń aldymyzda ǵylymdy tanytý mindeti tur. Mundaǵy eń basty baǵyttardyń biri – mınıstrliktiń barlyq ishki protsesterin tsıfrlandyrý. Bul syn-pikirlerge birden jaýap berýge jáne ǵylym men joǵary oqý oryndaryna bólinetin qarjynyń ashyqtyǵyn qamtamasyz etýge múmkindik beredi», - dedi Saıasat Nurbek.

Aldaǵy jumystardyń mańyzdylyǵyn eskere otyryp, jańadan qurylǵan Ǵylym jáne joǵary bilim mınıstrliginde tsıfrlandyrý jónindegi vıtse-mınıstr laýazymyn ashý qarastyrylyp otyr.

«Ol ishki protsesterdi tsıfrlandyrý jumysyn qadaǵalap, tıisti mınıstrliktermen jáne vedomstvolarmen ózara qarym-qatynas isine jaýap beretin bolady. Mysalǵa, bólingen qarjyny aldyn ala taldaý nátıjesi kórsetkendeı, tsıfrlyq platformany uıymdastyrý ǵylymı-zertteý ınstıtýttarynda qoldanysta bar barlyq zerthana jabdyqtaryn esepke alýǵa kómektesedi. Bul jańa jabdyqtardy satyp alý isin jyldamdatady jáne jumys istep turǵan zerthanalardy birlese paıdalanýdy qamtamasyz etedi», - delingen mınıstrlik habarlamasynda.

Eske salaıyq, Ulttyq ǵylym akademııasynda ǵalymdarmen kezdesý barysynda Memleket basshysy Qasym-Jomart Toqaev elimizdiń ǵylym salasyn basqarý júıesin jetildirý qajettigin atap ótken bolatyn.

Foto: gov.kz