Saıasat Nurbek Ǵylym mınıstrligi qalaı qurylǵanyn aıtty
Onyń aıtýynsha, Bilim jáne ǵylym mınıstrlikterin bólý máselesi qoǵamda 2-3 jyldaı talqylanǵan.
«Halyqaralyq tájirıbede de munyń birneshe úlgisi bar. Máselen, kórshiles Ózbekstanda mektepke deıingi, bilim jáne joǵary bilim boıynsha úsh mınıstrlik bar. 2018 jyly Reseı Federatsııasy da Joǵary bilim jáne aǵartý mınıstrligi dep ekige bóldi. Sondyqtan, Prezıdent búkil usynystardy, sarapshylardyń pikirlerin tyńdap, osyndaı sheshim qabyldady. Ótken aıdyń basynda ózimdi shaqyryp, osy Ǵylym jáne joǵary bilim mınıstrligi qurylyp jatqanyn, meniń joǵary bilimge qatysty usynystarym unap júrgenin aıtty. Ózderińizge belgili, men Prezıdent janyndaǵy Ulttyq keńestiń múshesi boldym, onda 2-3 ret kezdesip, kadr daıarlaý, joǵary bilim, qoldanbaly ǵylym jóninde pikirlerimdi aıtqan edim. Men birden kelistim, óıtkeni qazir Prezıdenttiń «Jańa Qazaqstan» tujyrymdamasyn qoldaýymyz kerek», - dedi Saıasat Nurbek QR Prezıdenti Teleradıokesheniniń «3 suraq» baǵdarlamasynda.
Sonymen birge, Saıasat Nurbek Prezıdentpen kezdesý qalaı ótkenin eske aldy.
«Kezdesý óte jaqsy boldy, Prezıdent kóterińki kóńil-kúıde boldy. Biraq jaýapkershilik te óte aýyr ekenin aıtty. Esimde qalǵan negizgi oı – «Saıasat, siz «Jańa Qazaqstannyń» jańa mınıstri bolyp taǵaıyndalyp otyrsyz. Sondyqtan jaýapkershilik sizdiń ıyǵyńyzda bolady, júıeli problemalar jınalyp qaldy, ǵylymnyń qazirgi mártebesi, ǵalymnyń qoǵamdaǵy orny, laýazymy, ataǵy múldem túsip qaldy. Sondyqtan, ǵylymnyń, ǵalymnyń, professordyń qoǵamdaǵy mártebesin kóterýge basa mán berińiz» dep tapsyrma berdi. Jáne de kadr daıarlaý máselesi – «Jańa Qazaqstannyń» negizgi irgetasy, negizgi basym baǵyty bolǵanyn aıtyp ketti. Sondyqtan men sol jaýapkershilikti túsinip, alǵysymdy aıtyp, Prezıdenttiń qoldaýyn suradym. Óıtkeni, shynynda da qazir jańa júıeli reformalardy bastaý da ońaı bolmas», - deıdi Ǵylym mınıstri.
Onyń aıtýynsha, eski Bilim jáne ǵylym mınıstrliginen 99 adam Ǵylym mınıstrligine aýysady.
«Árıne bul jetkiliksiz, sondyqtan Premer-Mınıstr men Ekonomıka mınıstrliginiń qoldaýymen 310 shtatty alyp jatyrmyz. Bul jumys jalǵasady, osy jyldyń sońyna deıin 200-250 adamǵa jetkizemiz (...) Mınıstr bolǵannan keıin ómir qatty ózgerdi. Kúnde demalyssyz jumys isteımiz. Jańa mınıstrlik nemese jańa mekeme qurýdyń úsh formaty bar. Birinshi formaty – daıyn mınıstrlikke, daıyn apparatqa kelý jáne jumysty ári qaraı jalǵastyrý. Ekinshi format – múldem jańa mekeme qurý jáne eń qıyny úshinshi formaty eken – jańa mınıstrlikti qurý jáne eskisinen bólinip ketý», - dedi S. Nurbek.
Eske sala ketsek, 11 maýsym kúni Parlament Májilisiniń depýtaty bolǵan Saıasat Nurbek QR Ǵylym jáne joǵary bilim mınıstri laýazymyna taǵaıyndaldy.
Vıdeodan alynǵan kadr
