Saıasat Nurbek grant jaıly qate aqparat taraǵanyn, bári ádil bólingenin aıtty
ASTANA. KAZINFORM — Memlekettik bilim grantyn alǵan 2 myńǵa jýyq stýdent odan bas tartty. Bul týraly Úkimet otyrysynan keıingi brıfıngte Ǵylym jáne joǵary bilim mınıstri Saıasat Nurbek aıtty.
«Ókinishke qaraı, BAQ-ta birneshe qate aqparat tarady. Birinshiden, tótenshe jaǵdaıǵa baılanysty kvota zańsyz dedi. Eń aldymen mundaı kvota bolǵan emes. Bilim týraly zańda jeńildigi bar, memlekettik bilim grantyn bólý barysynda belgili bir basymdyqqa ıe azamattardyń naqty 10 sanatyn reglamentteıdi. Olar: jetimder, múgedekter, qyzmetin óteý barysynda qaıtys bolǵandardyń balalary jáne basqalary. ıAǵnı, biz zańsyz eshteńe jasaǵan joqpyz. Sý tasqynynan zardap shekken 6 óńirdiń balalary, talapkerleri birqatar artyqshylyqqa ıe boldy. Bul — Úkimet, bizdiń mınıstrlik bıyl qabyldaǵan birrettik qana sheshim edi. Demek, olarǵa UBT-ǵa daıyndalýǵa qosymsha ýaqyt pen qańtar men naýryzdaǵy synama UBT sertıfıkatyn eger ol kezde bally joǵary bolsa, sony paıdalanýǵa ruqsat berildi», — dedi mınıstr BAQ ókilderiniń saýalyna oraı.
Onyń atap ótýinshe, ekinshi qate aqparat — atalǵan balalardyń oqýǵa túse almaýyna baılanysty qosymsha grant bólinýine qatysty boldy.
«Shyndyǵyna olaı emes. Búginde bul másele qalaı sheshilip jatyr? Birinshiden, 10 607 talapker joǵary ball alǵanymen grantqa ilige almaı qaldy. Olardyń naqty sany osy. Qazirgi ýaqytta jergilikti atqarýshy organdardan (2 760 grant), iri jumys berýshilerden (Freedom 400 grant bóldi), úkimetaralyq (Túrkııa Úkimeti Qazaq-túrik ýnıversıtetine 500 kvota bóldi) qosymsha grant bólindi. Búginde grant alǵanymen túrli sebepterge baılanysty bas tartylǵan 1 989 grantty qaıta bóldik. 10 607 talapkerdiń búginde 7 799-y grant aldy. Demek, olardyń máselesi tolyǵymen sheshildi. Qazir bizde rezerv qalyp otyr. Qyrkúıek aıynyń sońyn kútip otyrmyz. Granttan áli de bas tartatyndar bolýy múmkin. ıAǵnı, aqyly oqýǵa, basqa ýnıversıtetke aýysyp jatýy yqtımal. Bul granttar da zańmen belgilengen tártippen ulttyq testileý ortalyǵynyń tuǵyrnamasynda avtomatty túrde joǵary ball alǵan túlekter arasynda bólinedi», — dedi Saıasat Nurbek.
