Saıasat Nurbek ǵylym salasyn qarjylandyrýdyń baqylaý tetikterine túsinik berdi
ASTANA. KAZINFORM – Búgin Quryltaıdyń jalpy otyrysynda Ǵylym jáne joǵary bilim mınıstri Saıasat Nurbek ǵylym salasyna qatysty Joǵary aýdıtorlyq palatanyń usynystary oryndalǵanyn aıtty.
Quryltaıdyń jalpy otyrysynda depýtat Aıjan Sqaqova mınıstrlik tarapynan ǵylymdy qarjylandyrýdyń ashyqtyǵyn qamtamasyz etý, ǵylymdy basqarýdyń tıimdiligin arttyrý jáne ǵylymı zertteýlerdiń nátıjelerin praktıkaǵa engizý baǵytynda qandaı jumystar júrgizilip jatqanyn surady.
Óz kezeginde Ǵylym jáne joǵary bilim mınıstri Saıasat Nurbek byltyrǵy Joǵary aýdıtorlyq palatanyń 43 nusqaýlyǵy men usynystary kóbinese oryndalǵanyn aıtty. Sonyń ishinde úsh úlken zańǵa ózgerister engizilip, onyń arasynda qarjylandyrý, monıtorıng, qarjylandyrý tártibin kúsheıtý eskerilgen.
- Naqty monıtorıngke toqtalsaq, buryn shyn máninde monıtorıng júrgizilgen, biraq monıtorıngtiń nátıjeleri naqty quzyrettilikpen bekitilmegen. Sondyqtan qazirgi tańda óte mańyzdy sheshimder zańdarmen bekitildi. Birinshiden, Ulttyq ǵylymı keńesterdiń (ár joba boıynsha negizgi sheshim qabyldaıtyn) endi qylmystyq jaýapkershiligi, ıaǵnı naqty jaýapkershiligi belgilendi. Endi jaýapkershilik tek qana ákimshilik emes, Qylmystyq kodekste de bekitilgen. Ekinshiden, burynnan monıtorıng nátıjeleri tek qana nazarǵa alynǵan. Endi tolyqqandy erejelerde qaǵıdattar ózgerdi. Monıtorıng naqty bekitildi — onyń kestesi jobanyń basynda, ortasynda, bitkennen keıin de ǵylymı jobalardyń monıtorıngi júrgiziledi. Endi sol monıtorıng nátıjeleri bizdiń Ǵylym komıtetimen bekitiledi jáne naqty sharalar qabyldanady. Qazirdiń ózinde kommertsııalandyrý jobalary, ǵylymı granttyq jobalar birneshe Ulttyq ǵylymı keńestiń sheshimimen jabylyp jatyr nemese sotqa berilip jatyr. Atap aıtqanda, qatań is-áreketter qabyldanyp jatyr, - dedi mınıstr.
Sonymen qatar ol ekonomıkalyq saraptama naqty bekitilgenin aıtty. Ekonomıkalyq saraptama mindetti túrde qarastyrylyp, mindetti túrde kez kelgen jobanyń sheshim qabyldaǵanynyń aldynda tolyqqandy eskeriletin boldy.
- Sondyqtan qazirgi tańda Joǵary aýdıtorlyq palatanyń bergen nusqaýlyqtarymen búkil zańdarǵa jáne bizdiń buıryqtarymyzǵa tıisti monıtorıng, qarjy tártibi naqty tetiktermen engizildi, - dedi vedomstvo basshysy.
Buǵan deıin habarlanǵandaı, Quryltaı Tóraǵasy Aıbek Dádebaı zertteýlerdi qarjylandyrýda ǵylym men bıznes tyǵyz baılanysta bolýy tıis ekenin aıtty.
