Saıasat Nurbek Garvardta oqyp jatqan otandastarymyz jaıynda: Dúrbeleń salýǵa áli erte
ASTANA. KAZINFORM – Ǵylym jáne joǵary bilim mınıstri Saıasat Nurbek Garvard ýnıversıtetinde bilim alyp jatqan otandastarymyzdyń jaǵdaıyna baılanysty pikir bildirdi.
— Jaǵdaı kúrdeli. Mınıstrlik ony baqylaýda ustap otyr. Búginniń ózinde barlyq tıisti saýaldy joldadyq. Qabyldanǵan sheshim ázirshe túpkilikti emes. Qazirgi ýaqytta sot talqylaýy jalǵasyp jatyr. Kezekti sot otyrysy 29-yna belgilengen. Dúrbeleńge túsýge áli erte. AQSh-ta sot satysy sheshim qoldaý tabatyndyǵyna nemese zańdy kúshine enetindigine qatysty qorytyndy formatty aıqyndaýy múmkin. Sondyqtan da qazir sottyń resmı sheshimin kútý mańyzdy. Búginde Garvard ýnıversıtetinde «Bolashaq» baǵdarlamasymen 7 azamatymyz bilim alyp jatyr: beseýi magıstrant, ekeýi taǵlymdamadan ótýshi. Biz baǵdarlamanyń barlyq qatysýshysymen baılanysyp otyrmyz, — dedi mınıstr elordada búgin ótetin Astana halyqaralyq forýmy aıasynda.
Onyń atap ótýinshe, Garvard ýnıversıtetinde sheteldik stýdentterdi oqytýǵa shekteý engiziletindigine ne engizilmeıtindigine baılanysty túpkilikti sheshim qabyldanǵannan keıin mınıstrlik qajetti sharalardy qolǵa alady.
— Esterińizde bolsa «Fýkýsımada» iri apat bolǵan kezde Bolashaq keńsesin basqarǵan edim. Sol ýaqytta mınıstrlik deńgeıinde arnaýly tetik ázirlenip, komıssııa quryldy. Eger ahýal azamattarymyzǵa, olardyń mamandyqtaryna qatysty bolsa, onda biz mundaı shekteý joq ózge ýnıversıtetterge aýystyrýdy uıymdastyramyz. Plıýşa lıgasynda bir emes 9 ýnıversıtet bar jáne olar shamalas deńgeıde. Stýdentter atalǵan JOO-lardyń birinde stıpendııa taǵaıyndalǵan mamandyq boıynsha oqýyn jalǵastyra alady. Aýystyrý algorıtimi pysyqtalǵan, kelisim bar. Bul ýnıversıtetterdiń barlyǵy «Bolashaq» baǵdarlamasynyń seriktesi. Sondyqtan bizde barlyq ýaqytta ba is-qımyldyń balama stsenarııi bar, — Saıasat Nurbek.
Eske sala ketsek, Tramp ákimshiligi Garvardty sheteldik stýdentterdi oqytý quqyǵynan aıyrdy. Ýnıversıtet endi stýdenttik vıza alýǵa qajetti qujattardy bere almaıdy. Qazirdiń ózinde oqyp jatqan sheteldikter basqa ýnıversıtetterge aýysýǵa májbúr bolady, áıtpese olar deportatsııaǵa ushyraıdy.