Saıasat Nurbek: Elimizde 27 146 ǵalym jumys isteıdi
ASTANA. KAZINFORM — Bul týraly Ǵylym jáne joǵary bilim mınıstri Reseı ǵylym akademııasy Sibir bólimshesiniń delegatsııasymen kezdesýinde aıtty.
Delegatsııany RǴA vıtse-prezıdenti, Sibir bólimshesiniń tóraǵasy Valentın Parmon basqardy. Onyń quramynda Novosibir oblysyndaǵy Koltsovo jumysshy kentiniń ákimi Nıkolaı Krasnıkov, «Akadempark» AQ bas dırektory Dmıtrıı Verhovod jáne bıznes ókilderi boldy.
Bıyl mamyr aıynda Qazaqstan delegatsııasy Premer-mınıstrdiń orynbasary — Ulttyq ekonomıka mınıstriniń basshylyǵymen Novosibir oblysyndaǵy ǵylym qalashyǵyna baryp, ǵylymǵa negizdelgen aýmaqtardy damytý jónindegi Reseıdiń tájirıbesimen tanysqan bolatyn.
Kezdesý ǵylymı-tehnologııalyq saladaǵy qazaqstandyq-reseılik áriptestikti nyǵaıtýǵa baǵyttaldy. Ásirese joǵary tehnologııalyq aýmaqtardy qalyptastyrý men damytý boıynsha ozyq tájirıbelerdi almasý máselelerine erekshe nazar aýdaryldy. Mınıstr atap ótkendeı, ǵylym qalashyqtaryn qurý jobasy QR Prezıdenti Qasym-Jomart Toqaevtyń ǵylymdy jedel damytýǵa baǵyttalǵan bastamasy aıasynda júzege asyrylyp keledi.
— Ǵylym men ınnovatsııany damytý — eldiń jańa ekonomıkalyq damý baǵytynyń negizgi basymdyqtarynyń biri. Búginde elimizde 27 146 ǵalym jumys isteıdi, olardyń 47 paıyzy — jas zertteýshiler. Elde ǵylymı zertteýler men tájirıbelik-konstrýktorlyq jumystarmen aınalysatyn 423 uıym bar. Osy turǵyda ǵylym qalashyqtary ǵylymı zertteýlerdi, bilim berýdi, óndiristi jáne ǵalymdarǵa jaıly ómir súrý ortasyn biriktiretin tolyqqandy ınnovatsııalyq ekojúıe qalyptastyrýǵa múmkindik beredi, — dedi mınıstr.
Kezdesý barysynda RǴA Sibir bólimshesiniń ókilderi óńirdiń ınnovatsııalyq damýynyń qoldanystaǵy modelin tanystyrdy. Ol «Lavrentev tetraedry» qaǵıdasyna negizdelgen jáne dástúrli «ǵylym — bilim — óndiris» úshtaǵanynyń keńeıtilgen tujyrymdamasy. Munda tórtinshi qyr retinde turaqty ǵylymı-tehnologııalyq ekojúıeniń baılanystyrýshy býyny sanalatyn memlekettik basqarý júıesi qarastyrylady. Sondaı-aq Sibir bólimshesiniń tóraǵasy Valentın Parmon mınıstrdi Qazaqstan Respýblıkasynyń Sibir bólimshesimen ǵylymı-tehnıkalyq jáne bilim berý yntymaqtastyǵyn damytýǵa qosqan zor úlesi úshin akademık Gýrıı Ivanovıch Marchýktyń týǵanyna 100 jyl tolýyna arnalǵan mereıtoılyq medalmen marapattady.
Reseı ǵylym akademııasynyń Sibir bólimshesi — úsh akademqalashyqty, Novosibir memlekettik ýnıversıtetin jáne ondaǵan ǵylymı-zertteý ınstıtýttaryn biriktiretin eń iri ǵylymı-ınnovatsııalyq klasterlerdiń biri.
Kezdesý qorytyndysy boıynsha ǵylymı-tehnıkalyq yntymaqtastyqty ári qaraı damytý, sondaı-aq ǵylymǵa negizdelgen aýmaqtardy qurý jáne damytý salasyndaǵy tájirıbe almasý jóninde kelisimderge qol jetkizildi.
Aıta keteıik, qazaqstandyq ǵalymdar aýyzsýdy tazartatyn ınnovatsııalyq qondyrǵy jasady.