Saıasat Nurbek elimizde sýtegi energetıkasyn damytýǵa qatysty túsinik berdi

ASTANA. QazAqparat – Qazaqstanda sýtegi energetıkasy baǵytynda eki úlken ǵylymı ortalyqty damytýǵa ekpin qoıyldy. Bul týraly elordada ótip jatqan konferentsııada Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Sýtegi energııasyna aıtarlyqtaı nazar aýdaryp otyrmyz. Bul baǵytta qazir eki úlken ǵylymı ortalyq qurylyp jatyr. Birinshisi – Eýrazııa ulttyq ýnıversıtetinde. EUÝ bazasynda óte jaqsy ǵylymı rezerv qalyptasty. 10-15 jyl shamasynda jaqsy ǵalymdar toby jınaldy, sondaı-aq birneshe qoldanbaly ári iri jobalar júzege asyryldy. Sýtegi energetıkasy boıynsha bul ǵylymı ortalyqqa biz jetkilikti qarjy bólip jatyrmyz», - dedi S. Nurbek Qazaqstanda jańartylatyn energııa kózderin damytýǵa arnalǵan konferentsııada.

Onyń aıtýynsha, sýtegi avtomobıl ónerkásibinde óte tartymdy baǵytqa aınaldy. Japondyq úlken kontsernder sýtegi otynymen júretin kólikterge erekshe mán berip otyr. Sonymen qatar, Eýropanyń elderi sýtegi strategııalaryn ázirleýge kiristi.

«Mańǵystaý oblysynda «jasyl» sýtegin óndirý boıynsha iri joba iske qosylyp jatyr. Bul joba birtindep damyp keledi», - dedi Saıasat Nurbek.

Budan buryn habarlanǵandaı, byltyr Mańǵystaý oblysynda «jasyl» sýtegin óndirý jáne taratý ortalyǵyn qurý jobasy tanystyryldy.

Sondaı-aq, osy óńirde maman daıarlaý úshin Germanııa men Qazaqstannyń joǵary oqý oryndary arasynda yntymaqtastyq ornatý qarastyrylǵan.

Al bıyl maýsym aıynda Mańǵystaý oblysy Qaraqııa aýdanyndaǵy «jasyl» sýtegi óndiretin zaýyttyń qurylysy aıasynda Germanııanyń Federaldy Prezıdenti Frank-Valter Shtaınmaıer men Qazaqstan Premer-Mınıstri Álıhan Smaıylovtyń qatysýymen burǵylaý jumystaryn iske qosý rásimi ótti.