Saıasat Nurbek eldegi ýnıversıtetterde oqytý qunyna qatysty pikir aıtty
ASTANA. KAZINFORM – Ǵylym jáne joǵary bilim mınıstri Saıasat Nurbek eldegi ýnıversıtetterdiń aqyly bóliminde oqytý qunyna qatysty pikir aıtty.
Onyń aıtýynsha, mınıstrlik oqý aqysynyń shamadan tys ósýine jol bermeý maqsatynda joǵary oqý oryndarymen birlesip jumys istep jatyr.
— Qazirgi ýaqytta biz oqý aqysynyń ósimi 10–15%-dan aspaýyn, sondaı-aq onyń ınflıatsııa men shyǵyndarǵa sáıkes kelýin qamtamasyz etý úshin joǵary oqý oryndarymen tyǵyz jumys istep jatyrmyz. Іs júzinde tarıf deńgeıin tejep turmyz. Memleket joǵary bilim alýǵa qolaıly jaǵdaı jasaýdy erekshe baqylaýda ustap tur. Máselen, keıbir elde joǵary bilim alý múmkindigin mektep túlekteriniń sonshalyqty kóp bóligine berý qajet emes degen pikir bar. Al biz joǵary bilim alý múmkindigin qoldaý kerek dep sanaımyz, - dedi S. Nurbek Úkimet otyrysynan keıingi baspasóz máslıhatynda.
Osy oraıda ol elimizde grant sany artqanyn, «Ulttyq qor — balalarǵa» baǵdarlamasy men «Keleshek» júıesi iske qosylǵanyn eske saldy.
- Ulttyq ýnıversıtetterde oqý aqysy bekitilgen jáne onyń jyl saıynǵy ósýin baqylaýda ustaımyz. Jalpy alǵanda, Qazaqstanda joǵary bilim alý úshin tıisti jaǵdaı jasalǵan, - dedi mınıstr.
Buǵan deıin habarlanǵandaı, elimizdegi ýnıversıtetter men bilim baǵdarlamasyna qaraı oqý quny 600 myń teńgeden bastalyp, 4 mıllıon teńgege deıin jetti.
