Saıasat Nurbek «Bolashaq» túlegi týraly: Ol aqshany qaıtarýǵa kelisti

ASTANA. KAZINFORM – Ǵylym jáne joǵary bilim mınıstri Saıasat Nurbek «Bolashaq» baǵdarlamasynyń shartyn buzǵan túlek týraly pikir bildirdi.

Senat otyrysynan keıin BAQ ókilderiniń suraǵyna bergen jaýabynda mınıstr alamysh máseleni jeke baqylaýyna alǵanyn aıtty.

Aıta keteıik, Valerııa Gavrılenko «Bolashaq» baǵdarlamasymen Ulybrıtanııaǵa oqýǵa ketip, sodan qaıtpaı qalǵan. Kepilge qoıǵan múlkin shyǵaryp alǵannan keıin Halyqaralyq baǵdarlamalar ortalyǵy oqýdyń aqshasyn, ıaǵnı 30 mln teńge memleket qarjysyn garant bolǵan úshinshi taraptan talap etken. 

«2-3 kún buryn Gavrılenko tolyq óz kinásin moıyndap, ekijaqty kelisimshartqa qol qoıdy. Sol kelisimsharttyń aıasynda ol búkil aqshany qaıtaramyn dep ózine mindet aldy. Endi jaýapty tulǵalarǵa da Bas prokýratýra arqyly tıisti zańnama aıasynda jumys bastap kettik», — dedi ol.

Vedomstvo basshysy bul másele tek zań aıasynda sheshiletinin eske saldy.

«Gavrılenko aqshany tolyq qaıtaramyn dep ózine jaýapkershilik aldy, tıisti kelisimshartqa qol qoıyldy. Ol aqshany tóleýdi bastady. Sondyqtan garant tarapqa eshqandaı ókpe joq. Biz jaýap berýshi úshinshi tarapqa shaǵym túsirýge májbúr boldyq. Sebebi zań aıasynda olar da jaýapty. Osylaı isteýge týra keldi. Gavrılenko barlyq aqshany tólese, garant bolǵan azamattarǵa shaǵym bolmaıdy. Meniń oıymsha, olarǵa durys keńes berilmegen. Olar qaýipti sezip, zalaldy tolyq óteımiz dep oılaǵan», — dedi Saıasat Nurbek.