Saıasat Nurbek: Bilim alý úshin shetelge ketip jatqan jastardyń kóbeıgeni qynjyltady
QOSTANAI. QazAqparat - Belgili saıasattanýshy Saıasat Nurbek Qostanaıda ótken «JAS QOSTA» aqparattyq alańynda kóterilgen máseleler týraly aıtyp berdi, dep habarlaıdy «QazAqparat» HAA tilshisi.
Buǵan deıin Qostanaı oblysynyń Altynsarın aýdanyndaǵy «Jaılaý» demalys bazasynda aımaqaralyq aqparattyq lageri ótkenin habarlaǵan edik.
Aqparattyq alańda qostanaılyq jastarǵa tájirıbeli mamandar dáris ótkizdi. Solardyń biri - Saıasat Nurbek. Belgili saıasattanýshy zamanaýı úrdisterdiń qazirgi qazaq qoǵamynda qalaı iske asyp jatqany týraly aıtty.
«Qazaqstannyń ár óńirinde jas býynmen túrli formattaǵy kezdesýler uıymdastyrylyp jatyr. Búgin Qostanaı oblysynda tuńǵysh ret jastar lageri ótti. Bul sharaǵa Reseıden qandastarymyzdyń kelgeni qýantty. Basqosýda aqparat jedel almasyp jatqan qazirgi ýaqytta jastarǵa durys baǵyt berý talqylandy. Sondaı-aq, «Big data jəne jasandy ıntellekt» taqyrybynda dáris ótti. Jasandy ıntellekt baǵdarlamalyq júıeleri barlyq salaǵa kiriktirilip jatyr. Erterekte adamdar ǵana oılaı alady degen túsinik qalyptasty. Biraq, bul monopolııa ózgerdi. Robottar adamdardan da sapaly, jedel jumys isteıtin boldy. Alda talaı tehnologııalyq revolıýtsııalar kútip turǵanyn eskerý qajet. Negizi osy jasandy ıntellekt úrdisi qaıdan paıda boldy? Syrtqy mıgratsııany qalaı toqtatamyz? Mine, qostanaılyq jastarmen osy ispettes suraqtardy qarastyrdyq», - deıdi Saıasat Nurbek.
Saıasattanýshynyń sózine súıensek, túıtkilderdiń deni bilim salasy arqyly sheshiledi. Qazaqstanda zaman talabyna saı jańa mamandyqtar ashyldy. Robottandyrý jaqsy úrdis, biraq, bıotehnologııany da nazardan tys qaldyrmaǵan jón dep esepteıdi spıker.
«Bilim salasyna alańdaýshylyq bildirmeımiz desek te, sheshimin tappaǵan suraqtar bar. Bir ǵana Qostanaı oblysyn mysalǵa alaıyq. Qazirgi kezde kórshiles Reseıge bilim alý úshin qonys aýdaryp jatqan jastarymyz kóbeıdi. Olarǵa kiná arta almaımyz. Óıtkeni, ózderiniń áleýetterin ashatyn tetikterdi kórshi elden izdeıdi. Osy suraq bizdi kóbirek qynjyltady ári tolǵandyrady. Myna, biz elimizde de sapaly bilim beretin oqý oryndary bar ekenin túsindirsek, eshkim syrt jaqqa ketpeıdi. Tipti, «Tsıfrly Qazaqstan» baǵdarlamasy arqyly qolǵa alynǵan jobalardy kóbi bilmeıdi. Astana hab pen túrli startaptar bar, Nazarbaev ýnıversıtetinde jańa mamandyqtar ashylyp jatyr. Qyqsasy, jastar óz jerimizde tıimdi jobalardyń baryn bilse eken deımiz. Osyndaı jańalyqtardy óz jastarymyzǵa túsindirý úshin eldiń óńirlerin aralap júrmiz», - dep bólisti saıasattanýshy.
