Saıasat Nurbek beıresmı ınstıtýttardyń rýhanı jańǵyrýdaǵy róli jaıynda aıtty
Qoǵam ishinde adaldyq pen ádildik qaǵıdaty birinshi orynǵa shyqsa, rýxanı jańǵyrý ǵana emes, ekonomıkalyq damý da iske asady, dep xabarlaıdy QazAqparat tilshisi.
"Máselen, keńester kezinde beıresmı ınstıtýttardy kúsheıtý jumysyna qatty kóńil bóldi. Áli esimde, pıoner bolǵanda men mektepke avtobýspen baryp júrdim. Ata-anam baryp kelgenge bes tıynnan on tıyn beretin. Avtobýsta kondýktor joq. Árbir adam aqshany ózi salady. Men kishkentaı bolsam da, bes tıyndy salýdy abyroı sanaımyn. Aqshany salamyn da, shet jaqta keýdemdi tik ustap turamyn. Bıletim qolymda, ózime rıza bolyp turatynmyn. Joǵaryda "Eń úzdik kondýktor ol - seniń ar-uıatyń" dep jazylyp turatyn. Mine, beıresmı ınstıtýtty kúsheıtýdiń bir mysaly osy", - dedi Saıasat Nurbek búgin Astanda ótken "dóńgelek ústelde".
Osy oraıda sarapshy burynǵy kózqarasty Almatydaǵy "Ońaı" júıesin engizý tájirıbesimen salystyrdy. "Bir úlken problema boldy. Ol - "qoıandardyń" kóptigi. Jolaýshylardyń 40-60 paıyzy jolaqysyn tólemedi. Qazir jol júrý abonementterin de qoldan sheber jasaı bastady. Túpnusqadan esh aıyrmashylyǵy joq. Qoǵam qundylyqtarynyń qalaısha ózgergenin sodan-aq baıqaýǵa bolady. Al barlyǵy birdeı jolaqysyn tólese, qala bıýdjetine aqsha kóptep túsedi. Bylaısha aıtqanda, beıresmı ınstıtýttar tek sanany jańǵyrtýǵa ǵana emes, ekonomıkany damytýǵa da óz septigin tıgize alady", - dep atap kórsetti Saıasat Nurbek.
Onyń aıtýynsha, beıresmı ınstıtýttar oıyn erejesi ispetti. Qoǵam ishinde ony moıyndaıdy jáne sol boıynsha áreket jasaıdy. "Máselen, dárigerler arasynda Gıppokrat antyna adaldyq degen beıresmı ınstıtýt bar. Oǵan qatysty naqty zań joq. Gıppokrat antyna adal bolýǵa mindetteıtin normalar da jazylmaǵan. Bul - taza etıkalyq ustanym. Alaıda dárigerler ony saqtaýǵa tyrysady. Sol sııaqty quqyq qorǵaýshylar arasynda "ofıtserdiń abyroıy" degen taǵy bir beıresmı ınstıtýt bar. Ókinishke qaraı, osy ınstıtýttar, ishki qundylyqtar álsirep barady. Al sonyń barlyǵyn qalpyna keltirse, para da, jemqorlyq ta, qylmys ta azaıyp, xalyqtyń densaýlyǵy jaqsarady, ál-aýqaty kóteriledi. Jańǵyrý degen osy emes pe?", - dep atap kórsetti Saıasat Nurbek.
