Saıasat Nurbek Almatydaǵy jasóspirimniń ólimine qatysty: sýburqaqtan aqaý joq

ASTANA. KAZINFORM – Ǵylym jáne joǵary bilim mınıstri Saıasat Nurbek Almaty qalasynda sýburqaq mańynda bolǵan jas jigittiń ólimine qatysty pikir bildirdi.

«Sot-medıtsınalyq saraptamasynyń resmı qorytyndysyn kútip otyrmyz. Buny Almaty qalasynyń Bostandyq aýdandyq Polıtsııa basqarmasy qarap jatyr. Biz bul máseleni umytqan joqpyz, saraptama nátıjesin kútýge májbúrmiz, resmı túrde aqparat beremiz», - dep jaýap berdi Saıasat Nurbek Úkimet otyrysynan keıin ótken baspasóz máslıhatynda.

Mınıstrdiń málimdeýinshe, qazir sýburqaq shtattyq rejımde jumys istep tur.

«Tehnıkalyq jaǵynan taǵy da tekserdik, sýburqaqtan aqaý joq. Sot-medıtsınalyq saraptamanyń qorytyndysynan keıin tıisti sheshim qabyldanady», - deıdi vedomstvo basshysy.

Eske sala keteıik, bıyl 19 maýsymda Almatyda Ál-Farabı atyndaǵy atyndaǵy QazUÝ aýmaǵyndaǵy sýburqaq mańynda jas jigit qaıtys boldy. Oqıǵanyń beınejazbasy áleýmettik jelide taraǵan edi.

Almaty qalasynyń Polıtsııa departamenti bul fakt boıynsha tergeý bastalyp, sot-medıtsınalyq saraptama taǵaıyndalǵanyn habarlady.