Saıasat Nurbek aldaǵy ózgeris jaıynda: mınıstrliktiń ár mamanyna demografııa derekterin oqýdy tapsyrdym
ASTANA. KAZINFORM – Qazaqstan demografııalyq ósimge daıyn bolýy kerek. Bul týraly elordada «Bolashaq beınesi: nátıjeden – jańa strategııaǵa» atty forýmda QR Ǵylym jáne joǵary bilim mınıstri Saıasat Nurbek málim etti.
- Shyn máninde, kóp salada - adamı kapıtalda, ekonomıkalyq damýda, ınfraqurylymdyq damýda maqsatymyzdy sapalyq kórsetkishterge emes, sandyq kórsetkishterge baǵyttaımyz. Jalpy, elde qoljetimdilikti kóterdik, mektepterdiń sany kóbeıdi. Adamı kapıtal baǵytynda úlken sharalar atqaryldy, úlken resýrstar berildi. Sondyqtan myna qazirgi bizdiń adamı kapıtal ındeksinde de ósýimiz, ıaǵnı 190 eldiń ishinde 60-tyqqa kirýimiz de sol úlken sharalardyń, sol úlken resýrstardyń arqasynda, - dedi S. Nurbek.
Sonymen qatar mınıstr eldegi demografııaǵa toqtaldy.
- Demografııa – ol óte aıaýsyz kúsh. Tórt jyldan astam mınıstr qyzmetin atqaryp júrmin. Áriptesterimdi jınap, demografııa oqýlyǵyn oqyp shyǵýdy tapsyrdym. Nege deseńiz, demografııany kez kelgen memlekettik qyzmette júrgen, memlekettik basqarýmen aınalysqan adam, ásirese áleýmettik ári ekonomıkalyq damý salasynda túsinýi kerek. Adamdar sanynyń ósýi nemese halyqtyń azaıýy — bári ekonomıkalyq damýǵa tikeleı áser etedi: eńbek naryǵyna, tutynýshy naryǵyna, resýrstarǵa, ınfraqurylymǵa, áleýmettik saıasatqa. Qazir álemde eki ǵana aımaq bar jáne bul óńirlerde balalardyń sany turaqty ósip kele jatyr. Ol — Afrıka jáne bizdiń aımaǵymyz — Ortalyq Eýrazııa. Sondyqtan basqa elderde - Azııada, Amerıkada is júzinde toqtap qaldy. Japonııada 122 mln adam bar. Byltyr Japonııada 671 myń bala dúnıege keldi. Qazaqstanda 20,5 mln adam turyp jatyr, 2025 jyly bizde 300 myńnan astam bala dúnıege keldi. Atap aıtqanda, Qazaqstanda halyqtyń sany 6 ese az, biraq keminde Japonııanyń bir jylda týǵan balalarynyń jartysy bizdiń elde dúnıege keldi. Al Ózbekstanda halyqtyń sany Japonııadan 4 ese az, biraq dúnıege kelgen bala sany 200-300 myńǵa artyq. Bul óz kezeginde qýantatyn jaǵdaı, - dedi vedomsto basshysy.
Osy oraıda ol keıingi 5 jylda Qazaqstanda 996 700 adam dúnıege kelgenin, 2022 jylmen salystyrǵanda 5 paıyzdan astam ósim bolǵanyn aıtty.
- Sondyqtan bul demografııalyq ósimge biz daıyndalýymyz kerek. Soǵan bizdiń ınfraqurylym daıyndalyp jatyr. Qazir orta bilimge demografııanyń áseri mol. Sońǵy bes jyldyń ishinde 1 mln orynǵa 1 myń 242 mektep paıdalanýǵa berildi. Keıingi 4 jyldyń ishinde 4 esege oqý oryndarynyń tapshylyǵyn qysqarttyq. Alaıda áli de 248 myńǵa jýyq oryn tapshylyǵy bar, - dedi Saıasat Nurbek.
Buǵan deıin Japonııada demografııalyq quldyraý 45 jyl qatarynan jalǵasyp kele jatqanyn jazǵan edik.
