Saıan Hamıtjanov «Astana» fýtbol klýbynyń az ýaqyttaǵy jetistigine sebep tórt faktordy atady
ASTANA. QazAqparat - «Astana» fýtbol klýbynyń ÝEFA Chempıondar Lıgasynyń toptyq kezeńine ótýine baılanysty uıymdastyrylǵan baspasóz máslıhatynda klýbtyń prezıdenti Saıan Hamıtjanov jas fýtbol klýbynyń jetistikterine sebep birneshe faktordy atady.
"Astana" FK jeńisiniń syry nede desek, birqatar faktorlardy atap ótýge bolady. Birinshi faktor - fýtbol klýbynyń kýratorlary - elorda ákimi, "Samuryq-Qazyna" ulttyq ál-aýqat qorynyń basshylyǵy bul sport túrine kóp kóńil bóledi. Ekinshi faktor - komandanyń bas bapkeri Stanımır Stoılovtyń eńbegi. Bul kisi joǵary klasty jattyqtyrýshy, óz isiniń naǵyz sheberi, kúni-túni tek fýtboldy ǵana oılaıdy. Sońǵy eki jyl boıy eki maýsym ishinde bas bapker komandanyń oınaý tásilin, fýtbolshylardyń psıhologııasyn túbegeıli ózgertti. Úshinshi faktor - ol bizdiń oıynshylarymyzdyń eńbegi. Men úshin komandamyzdyń ár oıynshysy Qazaqstandaǵy eń myqty oıynshy. Tórtinshi faktor - klýbtyń ákimshilik shtabynyń jumysy. Alańǵa shyǵatyn komandanyń artynda taǵy júzdegen adam "kózge kórinbeıtin" jumys atqaryp otyr. Mine, "Astana" komandasynyń az ýaqyttaǵy jetistiginiń syry osy. Taǵy bir faktor bar - meniń oıymsha, komandanyń prezıdenti de jaman jumys istemeıtin sııaqty",-dep qaljyńdady S.Hamıtjanov.
Esterińizge sala keteıik, "Astana" - elordanyń kásibı fýtbol klýby. 2009 jyly negizi qalanǵan klýb prezıdenttik kásibı sport klýbynyń quramyndaǵy komanda. 2014 jylǵy Qazaqstan chempıony.
Foto: sport.gazeta.kz
