Saıaly Saryaǵashtyń sáýleti artyp keledi

ASTANA. QazAqparat - Shıpaly sýymen tanylǵan Saryaǵash qalasy jyldan jylǵa kórkeıip, damyp keledi. Búginde shahar aýmaǵyn abattandyrý maqsatynda Saryaǵash arqyly ótetin «Shymkent-Jetisaı» avtojoly boıyn abattandyrý úshin qalaǵa kireberiske jastarǵa serýendeýge arnalǵan alleıa jasaldy. Jumystardy «Saryaǵash-Tazalyq» MKK-si aýdandyq bıýdjetten bólingen 37 mln. teńgege jasady.

Paıdalanýǵa berilgen jańa alleıa ishine oryndyqtar men qoqys jáshikteri ornatylyp, kópjyldyq shyrsha aǵashtary egildi. Sonymen qatar, 3 dana eliktiń shaǵyn sáýlettik nysandary ornatyldy, dep habarlady «Ońtústik Qazaqstan» gazeti.

Munan bólek, Saryaǵash qalasyna kire beriste «Gelıos» JJQ beketine deıin  trassanyń eki betine aǵashtan kóriktendirilgen sharbaqtar ornatyldy. Oǵan qosa, aýdandyq bıýdjetten 3 mln. teńge qarjy bólinip «Saryaǵash-Tazalyq» MKK-ny tarapynan túngi jaryqtandyrý shamdary ornatylyp, gúl egetin úlken vazalar qoıyldy. Bul óz kezeginde, qalaǵa erekshe kórik berip tur.

«Shymkent-Jetisaı» avtojoly boıynan ótetin qala aýmaǵyndaǵy jarqabaqtardy retke keltirý maqsatynda aýdandyq bıýdjetten 13,7 mln. teńge qarjy bólinip jeńil konstrýktsııaly qabyrǵalar kóterilip, «Aǵaıyny aralas, jer tóresi - Saryaǵash» atty sóz jazyldy. Sonymen qatar, jarnama iletin qurylǵy ornatylyp, túnde jaryq beretin shamdar ilindi. Qalanyń kóshe boılaryna kóp jyldyq raýshan gúlderi egildi.