Almaty: Saıahattaǵy aıaldama kesheniniń qurylysy nege sozylyp ketti
ALMATY. KAZINFORM — Almatydaǵy Raıymbek batyr dańǵyly boıynda salynyp jatqan iri kólik-toqtaý keshenderiniń biri — «Saıahat» aıaldamasynyń qurylysy belgilengen merzimde aıaqtalmaı qaldy. Qala ákimdiginiń málimetinshe, nysannyń daıyndyǵy qazir — 85 paıyz, al merdiger uıym qurylys-montaj jumystarynyń bekitilgen kestesinen keshigip qalǵan.
Buǵan deıin qala bıligi «Saıahat» aýdanyndaǵy úsh kólik-toqtaý kesheniniń qurylysyn 2026 jylǵy sáýir aıynda aıaqtaýdy josparlaǵan edi. Jobanyń jalpy quny — 1 mlrd 658 mln teńge.
Alaıda keıingi málimetterge sáıkes, nysan tolyq paıdalanýǵa tek maýsym aıynda beriledi dep josparlanyp otyr.
Ákimdik dereginshe, qazirgi ýaqytta Raıymbek batyr dańǵyly boıyndaǵy birqatar nysan aıaqtalǵan. Atap aıtqanda, «Sálem» kólik-toqtaý kesheni (batys jáne shyǵys jaqtary) paıdalanýǵa berilgen. Jobanyń quny — 607 mln teńge. Sondaı-aq Qalqaman shaǵynaýdanyndaǵy № 7 qalalyq aýrýhana mańyndaǵy aıaldama kesheni de (dańǵyldyń soltústik jáne ońtústik jaqtary) aıaqtalǵan. Onyń quny 916 mln teńge bolǵan.
Al «Saıahat» keshenindegi jumystar áli jalǵasyp jatyr.
Qala ákimdigi qurylystyń keshigýine baılanysty bas merdigerge qatysty kelisimshart talaptaryna sáıkes sharalar qabyldanyp jatqanyn habarlady.
— Bas merdiger qurylys-montaj jumystarynyń bekitilgen kestesinen qalyp qoıǵan. Osyǵan baılanysty kelisimshart talaptaryna sáıkes merzimdi ótkizip alǵan ár kún úshin aıyppul (ósimpul) eseptelip jatyr, — delingen resmı jaýapta.
Sondaı-aq merdiger uıymǵa jumys qarqynyn kúsheıtý jóninde tapsyrma berilgen.
Joba Almaty aglomeratsııasynan keletin jolaýshylar aǵynyna qolaıly ári qaýipsiz jaǵdaı jasaýǵa baǵyttalǵan. Árbir kólik-toqtaý kesheninde uzyndyǵy shamamen 50 metr bolatyn shatyr qarastyrylǵan. Ol bir mezette alty avtobýstyń toqtaýyna múmkindik beredi.
Budan bólek, aıaldamalar syrtqy jaryqtandyrý júıesi, elektrondy aqparattyq taqtalar, oryndyqtar, qoqys jáshikteri jáne qorshaýlarmen jabdyqtalǵan. Aýmaqqa abattandyrý jumystary istelip, múgedektigi bar azamattar úshin taktıldi plıtkalar men pandýstar ornatylǵan.
Eske salaıyq, buǵan deıin Almatydaǵy Raıymbek batyr dańǵylynda salynyp jatqan BRT jobasy qaıta qaralyp jatqanyn habarlaǵan edik.
Osyǵan baılanysty qurylys jumystary ýaqytsha toqtatylyp, buryn salynǵan ınfraqurylymnyń bir bóligin buzý máselesi kóterildi. Bul jumystar merdiger kompanııanyń qarajaty esebinen atqarylýy múmkin.
