Saıahatshy ıen dalada qalaı aman qalýdyń joldaryn aıtty
ALMATY. QazAqparat - Brıtan saıahatshysy Ed Stafford Discovery Channel arnasyndaǵy baǵdarlamada dalada adasyp qalǵan jaǵdaıda qalaı aman qalýdyń joldaryn aıtty, dep habarlaıdy QazAqparat tilshisi.
Saıahatshy djýnglı ormandarynda, shól jerlerde, adam turmaıtyn aralda, taý men ormandarda jalǵyz turyp eksperıment jasap keledi.
Discovery Channel kanalyndaǵy «Ed Stafford: vyjıvshıı» baǵdarlamasynda ol japan dalada qalaı aman qalýdyń joldaryn úıretti.
«Eń aldymen týǵan týysqandaryńyzǵa qaıda baratynyńyzdy aıtyp qoıyńyz. Eger siz oralmaǵan jaǵdaıda olar qutqarýshy shaqyrýy kerek. Telefonyńyzǵa qajetti qutqarý qyzmetteriniń nómirlerin saqtap alyńyz», - dedi Ed Stafford.
Ien dalada joldy kún, aı, juldyzdarǵa ǵana qarap emes, ósimdikterge qarap ta tabýǵa bolady.
«Sút shóp ósimdigi daladaǵy kompas. Onyń japyraqtarynyń jalpaq tusy batys pen shyǵysqa qarap tursa, japyraqtarynyń qyry ońtústik pen soltústikke qaraıdy. Al iri tastardyń ońtústik jaqtaǵy tusy únemi qurǵaq bolady. Al sýyrlar inderiniń aýzyn ońtústikke qaratyp qazady. Eger jaqyn arada quz, jar bolsa, soltústik jaǵynda topyraq qurǵaq ári jarylǵan bolady. Al ońtústik jaǵynda ylǵaldy kók maısaly bolady. Biraq bul tásildi tek ońtústikten soltústikke sozylǵan quz jarlarǵa qatysty ǵana paıdalanýǵa bolady», - dedi ol.
Ed Stafford saıahat barysynda bar azyq-túlikti barynsha únemdeýge keńes beredi.
«Úıge qanshalyqty barǵymyz kelse de múmkindikterińizdi shekteýlerińiz kerek. Jolda ot jaǵyp demalýdy umytpańyz. Jaǵatyn eshteńe bolmasa tastardan SOS degen jazyp qoıyńyzdar. Sizdi izdep jatqan adamdar bar bolar. Tájirıbe kórsetkendeı, qolyńyzda túk bolmasa da aman shyǵýǵa bolady.
Tabıǵat anamyz baı, onyń baılyǵyn óz ornynda qoldana bilgen jaǵdaıda maqsatqa jetýge bolady», - dedi saıahatshy.
«Qorqynyshtan qutylý úshin otyryp, oılaný kerek», - deıdi ol.
Onyń aıtýynsha, azyq izdegen kezde syryn bilmeıtin shópter men jıdekterdi paıdalanbaǵan durys. Sonymen qatar laı sýdy ishpegen jón.
«Sýdy shoqtan ótkizip zalalsyzdandyryp alyp ishý kerek. Metal zattardy túnimen ashyq qoıyp, betine shyq turǵanyn kútý kerek. Ien dalada ańshylyq qasıet bolǵany qubap-qup. Dalada jortqan ań sizge as bolady.
Tek qana jıdektermen ómir súrý múmkin emes, az ýaqytta asqazanǵa kúsh túsedi. Jıdek tańdaǵanda da qustar shoqyp ketkenderin jeńizder, qustar jegen bolsa, adamdarǵa da zalaly joq bolýy tıis», - dedi Ed Stafford.
