Saıahatshy túrik otbasy Aqtaýǵa keldi
AQTAÝ. KAZINFORM – Túrkııanyń Ankara qalasynan Qazaqstannyń Astana qalasyna bara jatqan túrik saıahatshylary búgin Aqtaýǵa jetti. Idıl men Býrak esimdi erli-zaıypty eki jastaǵy ulymen birge Túrkııadan 12-tamyzda shyqqan. Olar dúnıejúzilik kóshpendiler oıyndaryn óz kózimen kórý úshin, elimizge arnaıy atbasyn tiredi.
– Dúnıejúzilik kóshpendiler oıyndarynyń turaqty jankúıerimiz. Bıylǵy oıyn baýyrlas qazaq elinde ótetinin estip qýandyq. Kelip qatysýǵa Qazaqstan týrızm mınıstrliginen ruqsat aldyq. Shaǵyn avtobýs satyp alyp, ishin alys jolǵa jaıly etip jabdyqtadyq. Kóligimizdiń ataýyn jaqsy yrymǵa balap «Kóshpendi» dep qoıdyq. Búgin atajurtymyzda qonaqasy jegen soń, Astanaǵa qaraı shyǵamyz. Saparymyzdyń kóńildi ári este qalarlyqtaı ótip jatqanyna qýanyp kelemiz, - deıdi saıahatshy Býrak Dýran.
Túrik otbasy Aqtaýǵa Bakýden kememen jetken. Keshe túnde Aqtaý teńiz portyna tústi. Baýyrlas ult ókilderi qazir qaladaǵy qonaqúılerdiń birinde tynyǵyp jatyr. Keshke qaraı kólikterimen Astanaǵa jolǵa shyǵýdy josparlaıdy.
Jıhankezder qazaq jerinde ózderine kórsetilgen syı-qurmetke rıza bolǵandaryn jetkizdi.
Buǵan deıin túrkııalyq otbasynyń avtobýspen Ankaradan Astanaǵa kóshpendiler oıynyna kele jatqanyn jazǵan edik.
