Saıahat, brend saǵat, eksklıýzıv áshekeı: adamdar Q-net qurǵan torǵa qalaı túsedi

QYZYLORDA. KAZINFORM – Qyzylorda oblystyq ekonomıkalyq tergep-tekserý departamenti oblys ortalyǵynda Q-net kompanııasynyń qurylymdyq bólimshesin áshkereledi. Jábirlenýshiler Kazinform tilshisine atyshýly qarjylyq uıym qurǵan torǵa qalaı túskenin aıtyp berdi. 

Departamenttiń málimetinshe, olar 2019 jyldyń tamyzy men 2022 jyldyń qańtar aıy aralyǵynda jelilik marketıng jáne elektrondy kommertsııa degen jeleýmen 51 adamnan 63 mln 373,5 myń teńgege jýyq qarajat tartqan.

«Bálen jerde altyn bar» degenge aldanǵandardyń biri – qala turǵyny Elmıra Janasheva. Jábirlenýshi jumys barysynda Q-net ataýy birde-bir ret atalmaǵanyn aıtty. Eń basty ereksheligi, aǵaıyn-týys, áriptes, dos-jaran sııaqty qarym-qatynasy óte jaqsy adamdar ǵana bir-birin tartady. 

– Meni qurbylarym shaqyrdy. Ózim úıde tiginmen aınalysamyn. Sony keńeıtip, óz aldyma tseh ashqym keldi. Olardyń «bizge qosylsań, armanyńa jetesiń» degen sózine sendim. Biraq keıin ózim aǵaıyn-týyspen aralasýdan qaldym. Óıtkeni tátem men sińlilerimdi, qaıyn atam men qaıyn sińlimdi tarttym. Árqaısysyna mıllıon teńgeden saldyrdym. Eshkim syrttan adam tartpaıdy. Onyń sebebin keıin túsindik. Óıtkeni týysqanyń seniń ústińnen aryz jazbaıdy. Al olar «aqsha aldymen jaqynyńa túskeni jaqsy emes pe?!» dep, seniń qamyńdy oılaǵan syńaı tanytady, - dedi Elmıra Janasheva. 

Taǵy bir jábirlenýshi Anar Ibraevany kelini qoıarda-qoımaı kóndirgen. 

– «Táte, ózim júgirip júrip jumys isteımin, maǵan tek salymshy kerek» dedi. Keıin jumys tásiline kóz jetkizgesin munyń qarjylyq pıramıda ekenin aıtyp edim, basqa qyzdar úgit-nasıhat júrgizdi. «Burynǵy músheleri alaıaq boldy, óz múddesi úshin aqsha jınap alyp qashyp ketti. Sol sebepti pıramıda dep esepteısizder, biraq shyn máninde olaı emes» dep túsindirdi. Ózderiniń saıahattaǵanyn, tabysyn kórsetip, salymshylarǵa apta saıyn 200 myń teńge túsip turatynyn aıtyp sendirdi. Alǵashqy kezde 900 myń teńge saldym. «5 jylǵa deıin jaramdy, 5 memleketke qydyra alasyz» dep kartochka berdi. Biraq men qydyrýdan buryn nesıemdi japqym keletinin aıttym. Ózim eki áriptesimdi tartqanymmen olarǵa bulaı ótirik aıta almadym, - dedi ol. 

Salymshylar «áý basta munyń Q-net kompanııasy ekenin bilgende kelmeıtin edik» desti. 

Oblystyq ekonomıkalyq tergep-tekserý departamenti tergeý barysynda jábirlenýshilerdiń kompanııaǵa 840 myń teńge men 1 mln 500 myń teńge aralyǵynda qarjy salǵanyn anyqtady.

– Kúdikti Baýyrjan Ýálı tez baıý maqsatynda jelilik marketıng jáne elektrondy kommertsııa degen jeleýmen kompanııanyń basqa ónimderin usynbastan jáne ony ádeıi joqqa shyǵaryp, shart boıynsha salymshyǵa búkil álemdegi qonaqúılerge jeńildikter, «Leya» markaly eksklıýzıvti altyn áshekeı buıymdar, «Bernhard H.Mayer» markaly altyn brend saǵat pen «ProSpark» markaly tis pastasynan usynylǵan «QVI tripsavr» saıahat kartasyn jarnamalaǵan. Biraq basty sot talqylaýynda sot kúdiktilerdiń bul is-áreketi jarnamalaýǵa jatady dep úkim shyǵardy. Alaıda, jábirlenýshi tarap pen departament appellıatsııalyq tártippen qaıtadan sotqa júgindi. Nátıjesinde kúdiktilerdiń bul is-áreketi qarjy pıramıdasy ekeni naqty dáleldendi, - dedi departamenttiń tergeý basqarmasynyń basshysy Medeý Taýbaı. 

Sot úkimimen Baýyrjan Ýálı, Rústem Jumageldıev, Darhan Shynǵojaev, Gúlzat Belgibaı, Gaýhar Belgibaı aldyn ala sóz baılasý arqyly adamdar tobymen qarjylyq (ınvestıtsııalyq) pıramıdany jarnamalaý, ıaǵnı aıtarlyqtaı zalal keltire otyryp, aqparatty jarııa túrde jáne elektrondy aqparattyq resýrstardy paıdalana otyryp, adamdardy oǵan tartqany úshin kináli dep tanyldy. Nátıjesinde kúdiktiler 5-6 jyl aralyǵyndaǵy merzimge bas bostandyǵynan aıyryldy. Sondaı-aq olardan «Toyota Camry» markaly kólik, Astana qalasynan 7 páter, jalpy kólemi 301 mln teńgeniń múlki tárkilendi. Sot sheshimimen tárkilengen múlik esebinen salymshylardyń aqshasy óndiriledi. Qalǵan múlik memleketke qaıtarylady.

Jábirlenýshi Elmıra Janasheva ózi tartqan adamdarmen birge ústemeaqyny aıtpaǵanda 10 mln teńge qaryzǵa batqan. Bári bankten nesıe alýǵa májbúr bolypty. 

– Birinshi sotta taýymyz shaǵylyp, endi aqshamyz qaıtpaıdy dep oıladyq. Appelıatsııaǵa berip, qujattardy qaıtadan kóterip, departamenttiń aralasýymen isimiz ońynan sheshildi. Kináliler tıisti jazasyn aldy. Aqshamyzdyń qaıtarylatynyna, jaqyn-jýyqtyń aldynda basymyzdy tik ustap júre alatynymyzǵa qýandyq, - dedi ol. 

Eń qyzyǵy, Q-net músheleri usynǵan saıahat kartasynda kók tıyn bolmaı shyqqan. 

– Salǵan aqshamyz kartada turǵanyna sendim. Kartany teksertip, ol bos bolyp shyqqanda aldanǵanymyzdy túsindim, - dedi jábirlenýshi Anar Ibraeva. 

Aıta keteıik, keıingi úsh jylda Qyzylorda oblysy boıynsha ekonomıkalyq tergep-tekserý departamenti 14 qarjylyq pıramıdanyń jolyn kesti.