Saıahat, brend buıymdar, úı men kólik: Perızat Qaırat 3,5 mlrd teńgeni qaıda jumsady
ASTANA. KAZINFORM — Eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırat pen anasynyń mıllıardtaǵan qarjyny qaıda jumsaǵany aıtyldy.
Prokýror Azamat Kezekenniń málimdeýinshe, Perızat Qaırat pen anasy Ǵaını Alashbaeva 2021 jyl men 2024 jyl aralyǵynda qaıyrymdylyq degen jeleýmen 3,5 mıllıard teńgeden astam qarajat jınap, osy kúnge deıin sán-saltanatpen ómir súrgen.
Qaıyrymdylyq jeleýimen jylý jınaǵan
— 2,86 mlrd — tasqynnan zardap shekkenderge kómek;
— 566 mln — Gazadaǵy jaǵdaıǵa gýmanıtarlyq kómek;
— 105 mln — festıvalder men forýmdarǵa;
— 21,6 mln — múgedek balalarǵa arnalǵan aýktsıon;
— Qalǵany — saıt pen Instagram arqyly jınalǵan qaıyrymdylyq qarjy.
Aqsha qaıda jumsalǵan:
— 7 páter satyp alynǵan (Highvill, Akbulak, Vela Village jáne basqa);
— 3 avtokólik (Lexus LX 600, Mercedes S 450, Haval H6 GT);
— 150 mln teńgeden astam (Cartier, Van Cleef, Gucci, Dior) brend buıymdary;
— Rebel Flowers (gúl bıznesi);
— 17 sheteldik sapar (London, Dýbaı, Qatar, Túrkııa, Reseı);
— 123 mln teńge páterdiń jóndeý jumystaryna;
— Kúndelikti shyǵyndar, ıaǵnı meıramhana, tehnıka, jıhaz, aıyppul taǵy sol sııaqty.
— Jaýapkershiligi shekteýli seriktestikter arqyly qarjyny qolma-qol aqshaǵa aınaldyrý (kıiz úı, gúl, zergerlik buıymdar men kómir jetkizilgendeı etip rásimdelgen).
Sot otyrysy jalǵasyp jatyr.
Buǵan deıin memlekettik aıyptaýshy Perızat Qaırat pen onyń anasyna taǵylǵan aıyptardy tizbektep shyqty.
Sýdıa suraǵyna jaýap bergen Perızat Qaırat aıyptar negizsiz taǵyldy dep, moıyndamaıtynyn jetkizdi.
Aıta ketsek, buǵan deıin de Perızat Qaırat ózine taǵylǵan aıyptarmen kelispedi.
Sondaı-aq Perızat Qaırat tergeý ızolıatory qyzmetkerlerinen jábir kórgenin aıtqan edi. Artynsha elorda polıtsııasy tergeý ızolıatorynda bolǵan jaıttyń vıdeosyn kórsetti.
Belgili bolǵandaı Perızat Qaırattyń soty ishinara jabyq ótedi.
Buǵan deıin elordada Perızat Qaırattyń isine qatysty aldyn ala sot otyrysy ótti.
Bıyl 30 maýsymda Perızat Qaırattyń isi sotqa jiberildi.
Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.