Saıabek Sahıev: AES qaldyqtaryn óńdeıtin jobamyzdy Túrkııa patenttep alýy múmkin

ASTANA. KAZINFORM – «ıAdrolyq fızıka ınstıtýty» respýblıkalyq memlekettik kásipornynyń bas dırektory Saıabek Sahıev qazaqstandyq ǵalymdar AES qaldyqtaryn óńdeıtin jobaǵa túrkııalyq kompanııa quda túsip otyrǵanyn málim etti.

- Bizdiń bir jobamyz – ıadrolyq atom elektr stansalarynan qalǵan qaldyqtardy óńdeý jobasy. Qazir bul álemde tek Frantsııa men Reseıdiń qolynan ǵana keledi. Osy tehnologııa bizdiń ǵalymdardyń da qolynan keledi. Biraq oǵan qarjy kerek, - dedi ol Senattaǵy kezdesýde.

Aıtýynsha, atalǵan jobanyń eń bastapqy kezeńine ǵana 2 mln dollar qajet.

- Oǵan qazir túrkııalyq kompanııa 3 mln dollar bólýge daıyn otyr. Biraq onyń óz kedergisi bar. Óıtkeni erteń patentin ózderine menshikteýdi talap etedi. Eki ortada búkil zertteýlerimizdi Túrkııaǵa berip qoıýymyz múmkin, - dedi ǵalym.

Saıabek Sahıev bul jobanyń basqa elderdegi balamasy 140 mln dollar turatynyn atap ótti.

- Týra osy óndiristi jasap berýge Argentına INVAP degen kompanııasy 140 mln dollar surap otyr. Al biz osy tehnologııany ózimiz usyna alamyz. Ǵylym qoryna berilip otyrǵan 300 mln teńge oǵan jetpeıdi, - dedi ıAdrolyq fızıka ınstıtýtynyń bas dırektory.

Buǵan deıin Atom energetıkasy jónindegi agenttiginiń tóraǵasy Almasadam Sátqalıev elimizde salynýy múmkin AES-terdiń orny týraly pikir bildirgen edi.