Saıabaqta qyzdy kóligimen qaǵyp óltirgen 19 jastaǵy stýdent sot aldyna keldi
AQTÓBE. QazAqparat - Aqtóbede 19 jastaǵy Sıýzanna Gamıdovany kóligimen qaǵyp óltirgen Sezim Samurat sot aldyna keldi. Ol jyldamdyqty asyryp, kóligin short burǵan kezde saıabaqtaǵy júrgen eki adamdy qaǵyp ketken bolatyn, dep habarlaıdy QazAqparat tilshisi.
Aqtóbedegi ortalyq saıabaqta jol-kólik apaty bolyp, oqıǵa ornynda 19 jastaǵy Sıýzanna Gamıdova qaza tapty . Sol kúni onyń janynda bolǵan Maqsut Anapın birneshe dene jaraqatyn alyp, otadan soń týǵan jeri Qostanaı oblysyna ketti.
Búgin №2 Aqtóbe qalalyq sotynda Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» baby boıynsha is qaraldy. 
Іs materıaldaryna súıensek, Sezim Samurat 7 shilde kúni keshkilik apasyn úıine aparyp tastaý úshin Aqtóbe qalasynyń Ábilqaıyr han dańǵyly boıymen júrgen. Ortalyq saıabaqtaǵy jol saǵatyna 60 shaqyrym qashyqtyqpen júrýge arnalǵanymen, sot saraptamasynan júrgizýshi Sezim Samurattyń saǵatyna 91 shaqyrymmen júrgeni anyqtaldy.
«Sol kúni keshkilik apamdy úıine aparyp tastaǵym keldi. Men ekinshi jolaqta kele jatqan kezde janyma aq mashınanyń jaqyndaǵanyn kórip, qorqyp kettim. Sol kezde ońǵa burylyp, júrginshiler jolyna shyǵyp ketkenmin. Esimdi bilmeımin. Meni bir adamdar mashına ishinen shyǵaryp aldy. Adam ólgenin aýrýhanada em qabyldap jatqan kezde bildim. Óz isimdi tolyq moıyndaımyn, ókinemin, keshirim suraımyn»,- dedi sottalýshy Sezim Samurat. Onyń aıtýynsha, jábirlenýshi taraptan ózi keshirim surap barmaǵan. Qyzynyń qateligin moıyndap, ata-anasy keshirim surady. Al jábirlenýshi tarap keshirim berip, moraldyq, materıaldyq shyǵyndaryn ótep aldy. Qazirgi kezde is qysqartylǵan tártippen ótip jatyr.
«Men jumysta júrdim. Bir kúnnen soń polıtsııa habar berip, Sıýzannanyń qaza bolǵanyn aıtty. Keıin máıithanaǵa baryp, bizdiń qyzymyz ekenine kóz jetkizdik. Biz Sezim Samuratqa keshirim beremiz. Bos bostandyǵynan aıyrý jazasyn taǵaıyndamaýdy suraımyz»,- dedi qaza bolǵan Sıýzanna Gamıdovanyń apasy Vıktorııa Kraınıkova.
Sot zalynda belgili bolǵany, sottalýshy Sezim Samurat Qudaıbergen Jubanov atyndaǵy Aqtóbe óńirlik ýnıversıteti, ekonomıka jáne quqyqtaný ınstıtýtynyń 2 kýrs stýdenti. Ol júrgizýshi kýáligin 2016 jyldyń shildesinde alyp, ákesiniń kóligin aıdaǵan. Keıin júrgizýshi kýáligin joǵaltyp alyp, 2017 jyldyń naýryz aıynda qaıta qalpyna keltirdi.
«Men bas-mı jaraqatyn alyp, bir aı boıy aýrýhanada em qabyldadym. Aýrýhanada jatqan kezde jábirlenýshi Maqsut Anapınniń de em qabyldap jatqanyn bildim. Biraq baryp, keshirim suraýǵa qoryqtym. Ol kezde shashym tústi. Bir apta tósekten tura almadym. Qazir densaýlyǵym ortasha. Sabaqqa baryp júrmin»,- dedi S.Samurat.
Sot otyrysy jalǵasyp jatyr.
