Sax Invest uıymdastyrýshysy salymshylardyń qarajatyn kazınoda utylyp, saıahattarǵa jumsaǵan

ASTANA. KAZINFORM — Afrıkanyń Angolasynda almastar óndiremiz degen jeleýmen qarajat tartqan Sax Invest ınvestıtsııalyq jobasynyń uıymdastyrýshysy salymshylardyń qarajatynyń edáýir bóligin jeke qajetine jumsaǵan. Bul týraly Bizdin Orta podkastynyń efırinde Qarjylyq monıtorıng agenttigi tergeý departamenti basshysynyń orynbasary Keńesary Baǵbanuly málim etti.

— Aqshany Afrıkada, Angolada almastar óndiremiz degen syltaýmen jınady. Adamdar senip, shamamen 9 mıllıard teńge saldy. Eń soraqysy, osy 9 mıllıardtyń 2 mıllıardyn negizgi uıymdastyrýshy kazınoda utylyp qalǵan. Taǵy 377 mıllıon teńge saıahattarǵa ketken — ol kezde bul soma shamamen 1 mıllıon dollardy qurady. Olar qoldanǵan bir format — jelilik marketıng. Qazaqstanda jelilik marketıngtiń ózi zańsyz emes, alaıda bul jaǵdaıda ol tek jamylǵy retinde paıdalanyldy, — dedi Keńesary Baqbanuly.

Sonymen qatar, spıker «Asar Baspana» jobasynyń 86 myń salymshydan 12 mıllıard teńgeden astam qarajat jınaǵanyn aıtty. Tergeý barysynda uıymdastyrýshylardyń eki formatta — jelilik marketıng pen tutynýshylar kooperatıvi arqyly jumys istegeni anyqtalǵan. Jedel-izdestirý sharalary barysynda negizgi kúdiktiniń baýyrynan 945 mıllıon teńge tárkilendi.

Eske salaıyq, Sax Invest pen Nazira Gold 2025 jyly Qazaqstandaǵy eń iri alaıaqtyq jobalar retinde tanyldy.

Buǵan deıin podkastta Ashat Nııazovtyń áreketine quqyqtyq baǵa beriletini jarııalanǵan bolatyn.

Sonymen birge, Bas prokýratýra ókili droppıng-shemalarǵa qatysqandardyń qylmystyq jaýapkershiligi kúsheıtilgenin aıtty.