Sax Invest qarjy pıramıdasynyń uıymdastyrýshylary 7 jylǵa sottaldy
ASTANA. KAZINFORM — Aqtaýda Sax Invest qarjy pıramıdasyn qurǵan jáne oǵan basshylyq etken uıymdasqan qylmystyq topqa qatysty sot úkimi shyǵaryldy.
Qarjylyq monıtorıng agenttiginiń habarlaýynsha, qylmystyq top uıymdastyrýshylary ınvestıtsııalyq qor retinde jasyrynyp, azamattarǵa baǵaly qaǵazdarǵa, qarjy quraldaryna jáne basqa da aktıvterge ınvestıtsııa salýdy usynǵan. Sonymen qatar Afrıka elderindegi almaz óndirý jónindegi halyqaralyq jobaǵa qatysyp jatqanyn málimdegen.
2018-2022 jyldar aralyǵynda qylmystyq shemaǵa Astana, Aqtóbe, Oral jáne Aqtaý qalalarynan myńnan astam salymshy tartylǵan.
— Tartylǵan qarajattyń jalpy somasy 9 mlrd teńgeden asty. Tergeý barysynda salynǵan qarajattyń edáýir bóligi kompanııanyń esepshottaryna emes, uıymdastyrýshylardyń jeke shottaryna aýdarylǵany anyqtaldy. Keıinnen bul qarajat jeke maqsattarǵa, onyń ishinde qumar oıyndarǵa, páterler satyp alýǵa, jeke turǵyn úı salýǵa jáne ózge de qajettilikterge jumsalǵan, — delingen habarlamada.
Sot uıymdasqan qylmystyq toptyń segiz múshesin kináli dep tanyp, olarǵa 6 jyldan 7 jylǵa deıingi merzimge bas bostandyǵynan aıyrý jazasyn kesti. Memleket kirisine jeke turǵyn úı men tsıfrlyq aktıvter tárkilendi.
Sonymen qatar azamattyq talaptardy oryndaý máselesi sheshilgenge deıin sottalǵandardyń múlkine salynǵan tyıym saqtaldy. Onyń ishinde eki avtokólik, eki páter jáne jer ýchaskesi bar.
Úkim zańdy kúshine engen joq.
Eske salaıyq, buǵan deıin Qazaqstanǵa World Business Consulting qarjy pıramıdasy isi boıynsha kúdikti ekstradıtsııalanǵanyn habarlaǵan edik.
