Saýytbek Ábdirahmanov: Sheraǵa qaldyrǵan úlgi úshin alǵysymyzdy aıtamyz
ALMATY. QazAqparat - Arystaı asyl aǵamyzdy shyǵarar sátte sońǵy ret basymyzdy ıip, Sheraǵa qaldyrǵan úlgi úshin alǵysymyzdy aıtamyz. Búgin belgili qalamger Sherhan Murtazany aqtyq saparǵa shyǵaryp salýǵa arnalǵan jıynda QR Parlamenti Májilisiniń depýtaty Saýytbek Ábdirahmanov osylaı aıtty, dep habarlaıdy QazAqparat tilshisi.
«Sheraǵa bala kúninen Saısamaı bolysty qaq mańdaıynan atqan Rysquldyń tárbıesimen ótken Turardyń jolyn jalǵady. Turardyń dańqyn bala kúninen estip ósken er Baýyrjan sol joldy jalǵap ótti. Bala kúninen Jýalynyń jerinde aty ańyzǵa aınalǵan, esimin jattap ósken Sheraǵań da sol jolda boldy. Mine, sol jol alda da jalǵasa beredi. Halyq barda, el barda, uly dalamyz barda daralarymyz da, danalarymyz da bola beredi. Qosh, Sheraǵa!», - dedi depýtat.
Saýytbek Ábdirahmanov búginde halqy Sherhan Murtazanyń rýhyna laıyqty qurmet kórsetip jatqanyn aıtty.
«Arystaı asyl aǵamyzdy shyǵarar sátte sońǵy ret basymyzdy ıip, taǵzym etip, Sheraǵa qaldyrǵan úlgi úshin alǵysymyzdy aıtamyz. Bir jaǵdaıǵa táýbe deımiz. Biz egemendi el atanyp, kók aspanymyzǵa kók týdy tikkeli beri eldik dástúrlerimiz qalpyna kele bastady. Solardyń biri asyldardy ardaqtaı alý, jaqsylar dúnıeden ótkende el bolyp, jurt bolyp joqtaı bilý. Qazir qalypty jaǵdaıǵa aınalǵan osyndaı dúnıeler bizde únemi bola bergen joq. Bir ǵana mysal aıtaıyn, er Baýkeń dúnıeden ótkende onyń tánin qara jer qoınyna 4 kún boıy bere almaı, ishten tynǵan kez bolǵan. Baýkeń dúnıeden ótken kún Qazaqstannyń Reseı quramyna óz erkimen qosylǵanyna 200 jyldyq torqaly toıyna tuspa-tus kelip, sol toı ótkenshe, soǵan kelgen hatshy Máskeýge jetkenshe «Baýkeń óldi» degen habar tek symsyz telefon arqyly halyqqa tarady. Osyndaı zaman bolǵan. Qazirgi kezde el bolyp qabyrǵamyz qaıysa alatynymyzǵa, eldigimizdi kórsete alatyndyǵymyzǵa shúkir aıtamyz. Aldyńǵy kúni túnnen qaraly habar jetkeli beri telearnalar, gazetter jalǵap, búkil qazaq eli Sheraǵany joqtap jatyr. Máıitke qurmet - ábden laıyqty taǵzym etý dep sanaımyn», - dedi S.Ábdirahmanov.
Májilis depýtaty jazýshynyń qaldyrǵan mol ádebı murasy jaıly da tilge tıek etti.
«Sheraǵańnyń qaldyrǵan ónegesi kóp. Ótken jyly «Egemen Qazaqstan» gazetinde jazýshynyń pýblıtsıstıkalyq týyndylaryn jınaqtap, «Namys naızaǵaıy» degen ataýmen shyǵardyq. Bul kitaptyń ataýynyń ózi dál qoıylǵan. Ol kisi ómir boıy namystyń naızaǵaıyn jarqyldatyp keledi. «Lenınshil jasty» laýlatqanda da, «Jalyndy» jandyrǵanda da, «Juldyzdy» jarqyratqanda da, «Egemendi» eńselendirgende de, ásirese Parlament minberinen aqyryp teńdik surap, til, din, el qorǵaý týraly ǵajaıyp sózder aıtyp, qashanda ulttyń, eldiń namysyn jyrtty. Bul kisi qazaqtyń jadynda ózine tán seri, eri qalpynda qalady. Solaı amanat etip ketti dep sanaıyq. Sol amanatqa adal bolýǵa tyrysaıyq», - dep aıaqtady sózin S.Ábdirahmanov.
