Saýytbek Ábdirahmanov: Elbasynyń bıliktegi 30 jyly - el ómiriniń aıtýly belesi
«Álem tarıhynda óz eliniń ómirin túbegeıli ózgertken iri tulǵalar barshylyq. Solardyń qatarynda Nursultan Nazarbaevtyń da oıyp oryn alatyny anyq. Elbasynyń Qazaqstan tarıhynda aıryqsha orny bar tulǵa ekeni qazirdiń ózinde ýaqyt synynan ótip, aıqyndaldy deı alamyz. Mine, dál osy kúnderde Nursultan Ábishulynyń Qazaqstan Kompartııasynyń Ortalyq komıtetiniń birinshi hatshysy qyzmetine saılanǵan tarıhı plenýmǵa dál 30 jyl tolyp otyr. Sol kezdegi ólshemmen qaraǵanda, ol qyzmet respýblıkanyń kóshbasshysy qyzmeti bolatyn. Osy 30 jyldyń ishinde ómirimizde óte úlken ózgerister boldy. Eń aldymen, Nursultan Nazarbaevtyń respýblıkany basqarýy arqyly qazaq halqynyń abyroı-ataǵy qalpyna keldi», - dedi Saýytbek Ábdirahmanov QazAqparat tilshisine.
1986 jylǵy Jeltoqsan oqıǵasynan keıin Qazaq KSR-daǵy ınternatsıonaldyq tárbıe týraly qaýly qabyldanǵan, sóıtip qazaq halqyn tutastaı ultshyldyqpen aıyptaǵan sheshim shyqqan. Qazaqstannyń Tuńǵysh Prezıdenti - óz qyzmetiniń alǵashqy aılarynda ol sheshimdi ózgertýge kúsh salyp, naqty nátıjege qol jetkizgen tulǵa.
«Nursultan Nazarbaev Kremldiń kúshi kemelinde turǵan kezde, partııa taramaı turǵan tusta, KSRO ydyramaı turǵan shaqta - 1989 jyldyń 29 tamyzynda Semeı ıadrolyq polıgonyn jabý týraly Jarlyqqa qol qoıdy. Sóıtip, adamzat tarıhynda alǵash ret óziniń qolyna ózi túsip turǵan asa qýatty tajal qarýdan óz erkimen bas tartqan birinshi basshy boldy. Budan burynǵy barlyq dáýirlerdegi patshalar, handar men ımperatorlar, árıne, óz eliniń soǵys qýatyn arttyrýǵa kúsh salǵan edi. Nursultan Nazarbaevtyń bul sheshimi barlyq jaǵynan ózin-ózi aqtady. Shynynda da, eger táýelsizdik jolyna túsken alǵashqy sátinde Qazaqstan álem sahnasyna qolynda ıadrolyq qarýy bar memleket retinde shyǵa kelgen bolsa, sóz joq, bizdiń respýblıkamyz halyqaralyq oqshaýlyqqa túsetin edi», - deıdi májilismen.
Saýytbek Ábdirahmanov óz sózinde Qazaqstan ıadrolyq qarýdan bas tartpaǵan jaǵdaıda bizdiń memleketimizge álemniń san túrli elderinen quıylǵan ınvestıtsııalar týraly áńgime de bolmaıtynyn aıtady. Nursultan Nazarbaev turǵylyqty halyqtyń úlesi 40 paıyzǵa jetpegen kezinde (Táýelsizdik qarsańynda qazaqtardyń sany jalpy halyqtyń 39 paıyzy ǵana bolǵan) táýelsizdikke yń-shyńsyz qol jetkizgen. Májilis depýtatynyń aıtýynsha, táýelsizdiktiń alǵashqy jyldarynan bastap Nursultan Nazarbaev halyqtyń mentalıtetin ózgertý, ekonomıka men qoǵamdy bir sıpattan basqa sıpatqa aýystyrý, demokratııany óristetý, naryqtyq qarym-qatynastardy ornatý sekildi kóptegen máselelerdi sheshken.
«Biz kezinde Qazaqstanǵa tabany tıip kórmegen, kóldeneń kók atty Kolbındi basqarýǵa jibere salatyn, sóıtip Ortalyq oılanbaı eksperıment jasaı salatyn respýblıka bolatynbyz. Elbasy sondaı jaǵdaıda júrgen qazaq halqynyń eńsesin kóterip, etektegi basyn tórge shyǵaryp berdi. Qazaqstandy ózi júrgizgen kópvektorly syrtqy saıasatynyń arqasynda barlyq eldermen tatý memleketke aınaldyrdy. Kóptegen iri elder ǵasyrlar boıy sheshe almaǵan túıindi sheshti. Atap aıtqanda, Qazaqstannyń aınalasyndaǵy barlyq eldermen shekarany shegendedi. Sóıtip, bizdiń bolashaqtaǵy urpaqtarymyzdyń qamsyz ómirine kepildik beretindeı jaǵdaı jasady», - deıdi Saýytbek Ábdirahmanov.
Qazaqtyń qasıetti tóri Arqaǵa el astanasyn alyp kelip, jańa qalanyń boı kóterýi, astanamen birge barlyq oblys ortalyqtarynyń túleýi, qazaq tiliniń memlekettik til mártebesin alýy, óńirlerdiń órkendeýi - Májilis depýtaty atap ótkendeı, Nursultan Nazarbaevtyń eren eńbegi.
«Biz Nursultan Nazarbaevtyń basshylyǵymen Qazaqstan Eýropadaǵy qaýipsizdik jáne yntymaqtastyq uıymyna tóraǵalyq etken elge aınaldy. EKSPO-2017 kórmesin ótkizý quqyn kóptegen azýy alty qarys memlekettermen talasa júrip, tartyp aldyq. Ol kórmeni abyroımen ótkizdik. Qazirgi tańda qazaq halqynyń jańa býyny qalyptasty. Jalaqy, zeınetaqy jetpeı jatqan jyldardyń ózinde Nursultan Nazarbaev eldiń bolashaǵyn alystan oılap, memlekettik «Bolashaq» stıpendııasyn belgiledi. Ol boıynsha oqyp shyqqan jastar ekonomıkanyń, rýhanı ómirdiń barlyq salalarynda qyzmet etip júr. Jalpy, osylaı sanamalap uzaq aıta berýge bolady. Óıtkeni, Elbasynyń el úshin etken eńbegin shaǵyn suhbatta qamtyp aıtý múmkin emes», - dedi ol.
Saýytbek Ábdirahmanov óz sózinde Elbasynyń tarıh júktegen taǵy bir synynan abyroımen ótkenin eske saldy. Onyń aıtýynsha, Nazarbaev Azııa qurlyǵynda, musylman memleketterinde, ıslam áleminde kóp kezdese qoımaıtyn úlken úrdisti bastap bergen.
«Óz erkimen memleket bıliginiń tizginin konstıtýtsııalyq jolmen Senat tóraǵasyna berip, bıliktiń sabyrly jaǵdaıda aýysýyna jaǵdaı jasady. Bul da - Elbasynyń kóregendiliginiń taǵy bir kelisti kórinisi deı alamyz. Sondyqtan, Nursultan Nazarbaevtyń el bıligine kelýiniń 30 jyldyq kezeńi - el ómirindegi aıtýly beles dep senimmen aıta alamyz», - dedi Saýytbek Ábdirahmanov.
