«Saýyǵyp shyǵasyz, áje!»: Atyraýlyq zeınetker ózin jigerlendirgen dárigerlerge alǵys aıtty

ATYRAÝ. QazAqparat – Atyraýda koronavırýsqa shaldyqqan 74 jastaǵy zeınetker «Saýyǵyp shyǵasyz, áje!» dep jigerlendirgen dárigerlerge alǵysyn bildirdi, dep habarlaıdy QazAqparat tilshisi.

Qurmanǵazy aýdanynda turatyn erli-zaıypty zeınetkerler Sáýirbaı Dáýitov pen Jemis Jantemirovanyń jastary 74-te. Olardyń bastapqyda dene qyzýynyń kóterilip, tamaqqa tábeti tómendegen. Al 23 qańtardan bastap entikpe, tamaq jáne bas aýrýy mazalaǵan.

«Erli-zaıypty zeınetkerlerde koronavırýs ınfektsııasynyń belgileri 31 qańtarda kúsheıgen. Sol kúni jedel-járdem brıgadasymen Atyraýdaǵy №2 oblystyq aýrýhanaǵa jetkizildi. Dárigerler naýqastardy jiti tekserýden ótkizdi. Erli-zaıyptylardan koronavırýs ınfektsııasyna qarsy PTR zertteý oń nátıje kórsetti. Er adamda ókpesiniń 17%, al áıelde 42% zaqymdanǵany belgili boldy», - dep málim etti aýrýhananyń baspasóz qyzmeti.

«Ekijaqty polısegmentarly pnevmonııa» dıagnozy qoıylǵan Jemis Jantemirova 9 kún jansaqtaý bóliminde em qabyldaǵan. Qazir erli-zaıypty zeınetkerlerdiń jaǵdaıy jaqsaryp, úıine shyǵaryldy.

«Aýrýhanaǵa túsken sáttegi qıyn jaǵdaıymdy aıtyp, jetkize almaımyn. Ózdigimnen dem alý qıynǵa tústi. Basym aýyryp, dene qyzýym 38 gradýsqa deıin kóterildi. «Saýyǵyp shyǵasyz, ýaıymdamańyz, áje!» dep jyly sózimen de, hattamaǵa sáıkes em-domymen janashyrlyq tanytqan dárigerlerdiń arqasynda aman qaldym. Qaýipti vırýsqa shaldyqqan adamdardy aman alyp qalý úshin kúni-túni kúresip jatqan №2 oblystyq aýrýhananyń dárigerleri men medbıkelerine, basqa da qyzmetkerlerine alǵysym sheksiz!», - deıdi Jemis Jantemirova.