Saýsaqtar qatty tońady: aqtaýlyq morj qysta teńizge túsýdiń ádisterin bólisti
AQTAÝ. KAZINFORM — Aqtaý qalasynyń turǵyny Elaman Tóleev bala kúninen jaz mezgilinde Kaspıı teńizine túsip úırengen.
Qazir jasy — 27 de. Sońǵy 5 jyldan beri ol qysta da teńizge shomylýdy ádetke aınaldyrǵan.
— Tańda teńiz jaqta júgiretinmin, sol kezde qysta teńizge túsip jatqan bir top úlken kisini kóretin edim. Olarǵa qarap ómirge qulshynysyn sezetinmin. Energııasy tasyp, aýrasy erekshe boldy. Sodan keıin ne úshin túsedi, qandaı paıdasy bar dep ınternetten izdeı bastadym. Ýaqyt óte kele er adamǵa óte kóp paıdasy baryn túsindim, — deıdi Elaman Tóleev.
Salqyn sýǵa turaqty túskenniń arqasynda ol 5 jyldan beri tumaý sııaqty maýsymdyq aýrýlardy umytqan.
— Qysta sýǵa túsý testosteron degen eń mańyzdy gormondy kóteredi. Terini qataıtady. Men ózim fýtbol oınaımyn, bulshyq etti qalpyna keltiredi. Sharshap tursań, energııa beredi. Sebebi dofamın bólinip, ózińdi kúshti sezinesiń. Qan aınalymyna da jaqsy. Infarkt, ınsýlttyń aldyn alýǵa kómektesedi. Qazir kóp adamda artyq salmaq bar, soǵan paıdaly. Óıtkeni salqyn sýǵa kirgende qońyr maı bólinip, aq maıdy joıady, — deıdi ol.
Aıtýynsha, qysta teńizge túsý ońaı emes. Ol úshin kúndelikti teńizge bara jatqanda ózińdi moraldy turǵyda daıyndaýyń qajet. Ádetke aınaldyrý adamnyń erik-jigerine baılanysty.
— Biz Aqtaýda aýa raıyna qaramastan teńizge shomyla beremiz. Kaspııdiń sýy muz bolyp qatpasa da salqyn bolyp turady. Oǵan dálel retinde aıtaıyn, mınýs 20 gradýsta Kólsaıǵa túskenmin. Biraq ol Kaspııden salqyn bolmady. Oral qalasynda muzǵa túsip júrgen adamdar da Kaspııdiń sýy salqyn dep aıtady, — deıdi Elaman.
Qazirgi tańda Aqtaýda qysta teńizge túsetin 100-den astam adam bar. Sonyń basym bóligi turaqty shomylady.
Elaman Tóleev bala kezden teńizde júzip úırengendikten tolqynǵa da qaramaı túse beredi.
— Morjdar kóbeıip keledi. Qazir jastar da, jasy úlkender de túsedi. Densaýlyǵyna jany ashıtyn, kútimmen qaraıtyn adamdar paıdasyn túsindi. Árıne tolqyn týlap turǵanda qaýipti bolady. Biraq jastaıymyzdan túsip úırengen soń tolqynǵa kire beremiz. Tasqa urynbaıyn dep saqtanyp júremiz. Paıdasy bar ekenin bilip, em bolsyn dep barǵasyn ba, sodan kúsh alamyz. Jalpy qaýipti. Saýsaqtar men baqaılar qatty tońyp qalady. Onyń ústine Mańǵystaýda jel qatty ǵoı, termospen ystyq sý aparyp, qoldarymyzdy shaıyp, tez-tez kıinip alamyz, — deıdi ol.
Ókinishke qaraı, Kaspıı teńiziniń tartylýy morjdarǵa da áser etken. Olar úırengen aýmaqtardan ketip, yńǵaıly jaǵalaý izdeýge májbúr.
— Teńizdiń tartylǵany óte qaıǵyly jaǵdaı. Men ózim teńizge sekirgendi jaqsy kóremin. Sol sekiretin jerlerimiz taıyz bolyp ketti. Qazir sekire almaımyz, — deıdi Elaman Tóleev.
Buǵan deıin Kaspıı teńiziniń jaǵalaýdan alystap bara jatqanyn jazǵan bolatynbyz.
