Saýryqov: Іshki týrızmdi damytýdyń ulttyq baǵdarlamasyn qabyldaý kerek
ASTANA. KAZINFORM — Májilis depýtaty Erbolat Saýryqov Premer-mınıstr Oljas Bektenovtiń atyna saýal joldap, ishki týrızmdi damytýdyń ulttyq baǵdarlamasyn qabyldaýdy usyndy.
— Resmı derekterge súıensek, 2024 jyldyń toǵyz aıynda ishki týrızm boıynsha 6 mıllıon adam saıahattaǵan, al týrıstik qyzmet kólemi 2020 jylǵy 33 mıllıardtan 168 mıllıard teńgege deıin bes ese ósken. Bul halyqtyń qyzyǵýshylyǵy zor ekenin dáleldeıdi.
Biraq, ókinishke qaraı, damý júıesiz, birizdi saıasat pen aıqyn baǵdar joq. Sondyqtan búgin biz júıeli sheshimderdi talap etemiz, — dep bastady depýtat.
Onyń sózinshe, elde ishki týrızmdi damytýdyń biryńǵaı ulttyq baǵdarlamasy joq.
— Mysaly, Kólsaı — respýblıkalyq deńgeıdegi nysan. Biraq oǵan aparatyn joldy jóndeý jergilikti aýdannyń moınynda. Sonda aýdan búkil eldiń brendine aınalǵan nysanǵa qaı qarajatpen jol salady? Kóptegen oblysta týrızm basqarmalary joq. Bul baǵyt kásipkerlikti damytý basqarmalaryna qosylyp, ekinshi kezekke yǵystyrylǵan. Aýdandarda tipti bir maman ǵana jaýap beredi nemese múlde joq. Mundaı jaǵdaıda júıeli damý bolýy múmkin emestigi aıdan anyq, — deıdi Erbolat Saýryqov.
Májilis depýtaty ishki týrızm salasynda da jarnama saıasatyna kóbirek kóńil bólý kerektigin atap ótti.
— Іshki týrızmdi damytýdyń ulttyq keshendi baǵdarlamasyn qabyldaý qajet. Onyń naqty kezeńderi men KPI kórsetkishteri bolý kerek. Ár oblysta týrızm basqarmasy, al aýdandarda jeke bólim qurylsyn. Ár óńirdiń ınvestıtsııalyq kartasy daıyndalyp, jer telimderi, ınvestıtsııalyq sharttar jáne memlekettik qoldaý tetikteri anyq jazylsyn. Aqyldy ınfraqurylym qurý qajet: jol, sanıtarlyq torap, Wi-Fi, demalys aımaqtary, fotozonalar bolýy shart, — degen Erbolat Saýryqov gıdter men ornalastyrý nysandaryn sertıfıkattaý júıesin engizý kerektigin aıtty.
Sondaı-aq, depýtat ár oblys jyl saıyn keminde bes týrıstik nysandy damytyp, olardyń abattandyrylýyn Úkimettiń turaqty baqylaýyna alýdy usyndy.
Buǵan deıin Almaty oblysyna 2025 jyly 2,5 mıllıonnan astam týrıst barǵanyn jazǵan edik.