Sáýirdiń tosyn minezi: Qaraǵandyda qar jaýdy
QARAǴANDY. KAZINFORM - Sáýirdiń bel ortasynda Qaraǵandy oblysynda aýa raıy kúrt qubylyp, óńirdi qar, kóktaıǵaq pen ekpindi jel basty. Kúrdeli meteojaǵdaı jol qozǵalysyn qıyndatyp, kommýnaldyq jáne tótenshe qyzmetterdiń jumysyn kúsheıtilgen rejımge kóshirýge sebep boldy.
Qaraǵandy qalasy ákimdiginiń málimetinshe, qolaısyz aýa raıynyń saldaryn joıý úshin kóshelerge 200-den astam arnaıy tehnıka jumyldyrylǵan. Qardyń tolassyz jaýýyna qaramastan, joldaǵy ahýal turaqty baqylaýda. Kommýnaldyq qyzmetter kóshe-jol jelisin táýlik boıy tazalap, qajet bolǵan jaǵdaıda qum-tuz qospalaryn qoldanyp jatyr.
Vedomstvo dereginshe, Qazybek bı aýdanynda 100 tehnıka men 140 jumysshy eńbek etse, Álıhan Bókeıhan aýdanynda 70 arnaıy tehnıka men 115 jol qyzmetkeri jumyldyrylǵan. Sonymen qatar saıabaqtar men gúlzarlarda 50 tehnıka men 180 qyzmetker jumys istep, magıstraldy kóshelermen qatar qoǵamdyq keńistikterdi de qatar kútip-ustaýǵa múmkindik berip otyr.
Osy jumystarmen qatar sınoptıkter óńirde aýa raıynyń qubylmaly sıpaty saqtalatynyn eskertip jatyr. «Qazgıdromet» Qaraǵandy oblystyq fılıalynyń málimetinshe, aımaq batystan shyǵysqa qaraı jyljyp kele jatqan tsıklonnyń jáne ony almastyratyn soltústik-batys antıtsıklonnyń yqpalynda.
— 16–20 sáýir aralyǵynda jaýyn-shashyn jaýady. Sonymen birge tuman túsip, kóktaıǵaq qalyptasyp, jeldiń ekpini artýy yqtımal. Kezeń sońynda túnde aýa temperatýrasy -3…-8°C-qa deıin tómendep, kúndiz +8…+13°C-qa deıin kóteriledi, - dep naqtylady sınoptıkter.
Mamandardyń aıtýynsha, aldaǵy kúnderi Qaraǵandyda aýyspaly bultty aýa raıy saqtalyp, soltústik-shyǵystan soǵatyn jeldiń jyldamdyǵy 9–14 m/s bolady, joldarda kóktaıǵaq baıqalady. Oblystyń birqatar aýmaǵynda jańbyr men qar aralas jaýyn-shashyn túsip, jeldiń ekpini 20 m/s-qa deıin jetýi, al tuman saldarynan kóriný deńgeıi tómendeýi múmkin.
— Jalpy óńir boıynsha aýa raıy qubylmaly sıpatta saqtalady: jaýyn-shashyn men qysqa merzimdi ashyq kezeńder almasyp otyrady, - dep málimdedi «Qazgıdromet» ókilderi.
Osyǵan baılanysty Qaraǵandy oblysynyń Polıtsııa departamenti júrgizýshilerge erekshe saqtyq sharalaryn saqtaýdy eskertti.
— Aýa raıy kúrt ózgergen jaǵdaıda jyldamdyq rejımin qatań saqtaý, araqashyqtyqty ulǵaıtý, kúrt manevrler men tejelýlerden bas tartý qajet. Qarapaıym qaýipsizdik talaptaryn elemeý jol-kólik oqıǵalaryna ákelýi múmkin, - dep atap ótti departamenttiń baspasóz qyzmeti.
Qolaısyz aýa raıy jol-kólik oqıǵalaryna da sebep bola bastady. Qaraǵandy oblystyq Tótenshe jaǵdaılar departamentiniń málimetinshe, «Astana – Qaraǵandy – Almaty» avtojolynyń 232-shaqyrymynda, Temirtaý qalasynan 20 shaqyrym jerde jeti jolaýshysy bar, onyń ishinde tórt bala otyrǵan jeńil kólik jol jıegine shyǵyp ketken.
— Oqıǵa ornyna jedel jetken qutqarýshylar kólikti tazartylǵan jol bóligine shyǵaryp, keıin ol qozǵalysyn jalǵastyrdy. Zardap shekkender joq, medıtsınalyq kómek qajet bolǵan joq, - dep habarlady vedomstvo.
Qazirgi ýaqytta barlyq qyzmet kúsheıtilgen rejımde jumysyn jalǵastyryp jatyr. Mamandar óńir turǵyndaryna sınoptıkter boljamyn eskerip, qaýipsizdik sharalaryn saqtaýdy jáne jolǵa shyǵarda aýa raıy jaǵdaıyn mindetti túrde nazarǵa alýdy usynady.
Buǵan deıin 16 sáýirge Qazaqstannyń 17 óńirinde daýyldy eskertý jarııalanǵany habarlanǵan.