Sáýirde teńge 3,1%-ǵa nyǵaıdy — Ulttyq bank valıýta naryǵy boıynsha málimet berdi
ASTANA. KAZINFORM — Sáýir aıynyń qorytyndysy boıynsha teńge baǵamy 1 AQSh dollary úshin 463,09 teńgege deıin, ıaǵnı 3,1%-ǵa nyǵaıdy, dep habarlaıdy Ulttyq banktiń baspasóz qyzmeti.
Qarjylyq retteýshiniń málimetinshe, Qazaqstan qor bırjasyndaǵy saýda-sattyqtyń ortasha kúndik kólemi bir aıda 372 mln AQSh dollarynan 394 mln AQSh dollaryna deıin artty. Saýda-sattyqtyń jalpy kólemi 8,7 mlrd AQSh dollaryn qurady.
Sáýirde respýblıkalyq bıýdjetke transfert bólýdi qamtamasyz etý maqsatynda Ulttyq qordan 300 mln AQSh dollaryna valıýta satyldy. Ulttyq qordan satý úlesi jalpy saýda-sattyq kóleminiń 3,5%-yn nemese kúnine orta eseppen 13,6 mln AQSh dollaryn qurady.
— Kútiletin fıskaldyq túsimderdi eskere otyryp jáne Úkimettiń aldyn ala boljamdy ótinimderi negizinde Ulttyq bank mamyr aıynda respýblıkalyq bıýdjetke transfert bólý úshin Ulttyq qordan 400 mln dollardan 500 mln AQSh dollaryna deıingi mólsherde valıýta satylady dep boljaıdy. Sáýirde «aınalaý» operatsııalary aıasynda shamamen 354 mlrd teńge alyndy. Mamyr aıy boıy osy maqsatta 354 mlrd teńge balamasynda valıýta satylady dep kútiledi, — delingen habarlamada.
Ulttyq qor qarajatymen operatsııalar júrgizý, sondaı-aq «aınalaý» tetigin iske asyrý kezinde Ulttyq bank naryqtyq beıtaraptyq qaǵıdatyn ustanady.
Sáýir aıynda Ulttyq bank valıýtalyq ınterventsııa júrgizgen joq.
Ótken aıdyń qorytyndysy boıynsha kvazımemlekettik sektor sýbektileriniń valıýtalyq túsimniń bir bóligin mindetti satý normasy aıasynda valıýta túsimin satý kólemi shamamen 273 mln AQSh dollaryn qurady.
Zeınetaqy jarnalarynyń túsimi men teńge baǵamynyń nyǵaıýyna baılanysty BJZQ zeınetaqy aktıvteriniń valıýtalyq úlesi 40%-dan tómen boldy. Osyǵan oraı Ulttyq bank sáýirde bırjadaǵy saýda-sattyq arqyly 502 mln AQSh dollaryna shetel valıýtasyn satyp aldy. Bul — jalpy saýda-sattyq kóleminiń shamamen 5,8%-y. Aldaǵy sheshimder de zeınetaqy aktıvterin ınvestıtsııalyq basqarý aıasynda naryqtyq jaǵdaıdy eskere otyryp qabyldanady.
Ashyqtyq qaǵıdatyn ustana otyryp, Ulttyq bank valıýta naryǵynda júrgiziletin operatsııalar týraly aqparatty turaqty túrde jarııalap turady. Qysqamerzimdi keleshekte teńge dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýal men geosaıası jaǵdaıǵa baılanysty bolady.
Ulttyq bank teńgerimsizdiktiń jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi aıyrbas baǵamy rejımin ustanýdy jalǵastyrady.
Budan buryn Ulttyq bank teńge baǵamy belgilenetin valıýtalar tizimin keńeıtetinin jazdyq.
