Sáýirde Stadler kompanııasynyń alǵashqy vagondary qatynaı bastaıdy

ASTANA. KAZINFORM – Kelesi aıda Qazaqstanǵa Stadler jolaýshylar vagondarynyń alǵashqy legi jetkiziledi. Bul týraly Úkimettegi brıfıngte Kólik mınıstri Nurlan Saýranbaev málimdedi.

– Qazir qabyldaý protsesi júrip jatyr. «Qazaqstan temir joly» kompanııasynyń habarlaýynsha, sáýir aıynda alǵashqy jetkizilimdi kútip otyrmyz, – dedi mınıstr.

Jańa vagondardy eń tanymal týrıstik baǵyttarǵa shyǵarý josparlanyp otyr.

N.Saýranbaevtyń aıtýynsha, buǵan deıin 2025 jyldyń jeltoqsanynda 51 vagon jáne bıyl taǵy 91 vagon jetkizý josparlanǵan. Sáýir aıyna qaraı olardyń jalpy sany 142 vagon bolady dep josparlanyp otyr.

Onyń sózinshe, jetkizilimniń keshigýi Shveıtsarııa men Qazaqstanda qoldanylatyn standarttardaǵy aıyrmashylyqtarǵa, sondaı-aq QTJ tarapynan qoıylǵan qosymsha máselelerge baılanysty.

– Qazir retteý men baptaý jumystary júrip jatyr. Stadler – iri jarııa kompanııa, sondyqtan munda aıtylatyn kez kelgen másele olardyń bırjasyna jáne basqa da protsesterine áser etýi múmkin. ıAǵnı, bul kompanııa úshin sezimtal taqyryptar. Jalpy, belgili bir máseleler bar, biraq olardy saıasattandyrýdyń qajeti joq, bul jumys barysyndaǵy máseleler, – dep tolyqtyrdy mınıstr.

Kelisimshart talaptaryna sáıkes, aldyn ala tólem shamamen 160 mlrd teńgeni quraǵany aıtyldy. Sharttyń jalpy somasy – shamamen 540 mlrd teńge. Al naqty tólengen qarajat kólemi QTJ-nyń ishki korporatıvtik aqparaty sanalady.

Buǵan deıin Nurlan Saýranbaev Iranǵa baǵyttalǵan júk jóneltimderi men logıstıka ahýaly týraly suraqtarǵa jaýap berdi.