Saýran qalashyǵynda restavratsııa jumystary bastaldy
ASTANA. KAZINFORM — Túrkistan oblysynyń Saýran aýdanyndaǵy Saýran qalashyǵynda ǵylymı-restavratsııalyq jumystar bastaldy.
«Qazqaıtajańartý» RMK mamandary hanaka men medreseni qalpyna keltirý jumystaryna kiristi. Jumys barysynda ǵımarat qabyrǵasynyń betki qabatyndaǵy zaqymdanǵan kirpishterdi aýystyrý josparlanyp otyr. Sondaı-aq tarıhı nysandardy qorshap turǵan tireý qabyrǵalarynyń úgitilgen sylaq qabaty qaıta sylanady.
Restavratsııa kezinde eskertkishterdiń tarıhı kelbeti men sáýlettik ereksheligin saqtaýǵa basymdyq beriledi. Qoldanylatyn qurylys materıaldary nysannyń ózindik sıpatyna saı iriktelip, jańartylǵan bólikterdiń eskertkishtiń bastapqy sáýlettik kelbetimen úılesimdi bolýy eskeriledi.
Atqarylyp jatqan jumystar hanaka men medreseniń odan ári búlinýine jol bermeı, olardyń beriktigin arttyrýǵa jáne tarıhı kelbetin saqtaýǵa baǵyttalǵan.
Saýran qalashyǵy – Túrkistan oblysyndaǵy tarıhı-mádenı muranyń mańyzdy nysandarynyń biri. Qalashyqtaǵy eskertkishterdi saqtaý kóne shahardyń tarıhyn tereńirek zerdeleýge jáne keńinen tanytýǵa yqpal etedi.
Aıta ketelik Jarkent meshitinde tarıhı kelbetti saqtaı otyryp restavratsııa júrgizilip jatqany týraly jazǵan edik.
