Sáýir-mamyr aılarynda terrorızm men ekstremızm úshin 13 adam sottaldy
ASTANA. KAZINFORM — Sáýir-mamyr aılarynda UQK tergep-teksergen qylmystyq ister boıynsha terrorıstik jáne ekstremıstik qylmystar jasaǵany úshin 13 adam ártúrli merzimge bas bostandyǵynan aıyrý jazasyna sottaldy. Bul týraly UQK baspasóz qyzmeti málim etti.
Olardyń biri, Astana qalasynyń turǵyny áleýmettik jelilerde terrorıstik ıdeologııany nasıhattaǵan, sondaı-aq aınalasyndaǵylardy terrorıstik belsendilik aımaqtaryna shyǵýǵa úgittegen. Sot sheshimimen ol 8 jylǵa bas bostandyǵynan aıyryldy.
Ekinshisi, Shymkent qalasynyń týmasy aınalasyndaǵylardy Qazaqstanda teokratııalyq memleketin qurýǵa shaqyryp, terrorızm ıdeıalaryn taratqan. Sot ony 7 jylǵa bas bostandyǵynan aıyrýǵa úkim shyǵardy.
— Osy kezeńde Astana, Almaty, Shymkent qalalarynda, Atyraý, Aqtóbe, Jambyl, Qaraǵandy, Túrkistan jáne Abaı oblystarynda osyndaı qylmystar jasady degen kúdikpen 11 adam, onyń ishinde 2 sheteldik jáne shetelden ekstradıtsııalanǵan 3 Qazaqstan azamaty ustaldy, — dep jazdy komıtetten.
UQK málimetinshe olar ǵalamtorda jáne óz aınalasynda ekstremıstik materıaldardy taratty, terrorıstik belsendilik aımaqtaryna shyǵýǵa jáne ózderiniń ustanymdarymen kelispeıtin adamdarǵa qatysty zorlyq-zombylyqqa shaqyrdy degen kúdikke ilinip otyr.
Qylmystyq kodekstiń tıisti baptarynda sotqa deıingi tergep-tekserýler júrgizilip jatyr.
Komıtet QR Qylmystyq-protsestik kodeksiniń 201-babynyń 1-bóligine sáıkes ózge aqparat jarııa etýge jatpaıtynyn eskertti.
Buǵan deıin UQK Shekara qyzmeti temeki kontrabandasynyń iri partııasyn anyqtady.
