Sáýir aıynda óńirlerde qandaı týrıstik is-sharalar josparlanǵan
ASTANA.KAZINFORM - Sáýir aıynda elimizde týrızm salasynda túrli formattaǵy is-sharalar ótedi. Ár óńirde ishki jáne kelý týrızmin damytýǵa baǵyttalǵan kórmeler, festıvalder, oqytý semınarlary jáne basqa da is-sharalar ótkizý josparlanǵan.
Almaty: 23-25 sáýir kúnderi Almatyda aıdyń basty týrıstik is-sharasy – 23-shi halyqaralyq KITF-2025 týrıstik kórmesi ótedi. Oǵan elimiz ben sheteldiń týrızm salasyndaǵy jetekshi ókilderi qatysady.
Shymkent: Qalada qyzǵaldaqtyń sımvolyn dáripteıtin «Qyzǵaldaq joly» festıvali ótedi. Baǵdarlama aıasynda teatrlandyrylǵan qoıylym, sherý jáne jármeńke ótkizý kózdelgen.
Túrkistan oblysy: 15 sáýirde Túrki áleminiń rýhanı astanasy – Túrkistandaǵy etnoaýylda dástúrli neke qııý rásimi – Neke Tour atty erekshe shara ótedi.
Aqmola oblysy (Býrabaı): Býrabaıda týrızmdi damytýǵa baǵyttalǵan birqatar semınar men trenıng uıymdastyrylady:
• Týrızmdegi marketıng
• Ekotýrızmdi damytý
• Gastrotýrızm negizderi
• Agrotýrızm – óńir damýynyń faktory
• Ekskýrsovodtyń negizgi daǵdylary
Shyǵys Qazaqstan oblysy: 19-20 sáýir kúnderi Óskemen qalasyndaǵy «Tıtan» sport kesheni bazasynda «Shyǵys arǵymaq» kórmesi ótedi. Bul is-shara at týrızminiń úzdik tájirıbelerin usynýǵa baǵyttalǵan. Atqa miný ónerin nasıhattaý arqyly ulttyq mádenıetti dáripteý jáne belsendi demalysty damytý kózdelgen.
Aıta keteıik, Qazaqstanda týrızmge salynǵan ınvestıtsııa kólemi 20,3%-ǵa artty.