Saýndtrek keshi: Elbasy qorynyń laýreattary erekshe kontsert qoıdy
ALMATY. QazAqparat - Almatyda Tuńǵysh Prezıdent qorynyń laýreattary tanymal saýndtrekter men zamanaýı ánderdiń erekshe sımbıozyn oryndady, dep habarlaıdy QazAqparat tilshisi.
Abaı atyndaǵy Opera jáne balet teatrynyń sahnasynda QR Tuńǵysh Prezıdenti qory laýreattarynyń «Júrektegi armanmen zańǵarǵa samǵaıyq» atty kontsert ótkizdi.
Qordyń baspasóz qyzmeti habarlaǵandaı, án men mýzyka saltanat qurǵan keshte álemge tanymal klassıkalyq týyndylar oryndaldy. Sahnada Djastın Gýrvıts, Tólegen Muhamedjanov, Djeıms Horner, Djo Hısaıshı, Leonard Bernstaın, Ádiljan Tolyqpaev, Ábilqaıyr Jarasqan, Edýard Artemev, Hans Tsımmer sııaqty kompozıtorlardyń kınodaǵy tanymal saýndtrekteri shyrqaldy. Sonymen qatar, ónerpazdar «La-La Lend», «Troıa», «Vestsaıd oqıǵasy», «Shındler tizimi», «Gladıator», «Kóshbasshy joly» kınolaryndaǵy qulaqqa jaǵymdy áýenderdi oryndady.
Bıylǵy kontsert Nursultan Nazarbaev jarııalaǵan Jastar jylyna arnaldy.
«Bul - shyǵarmashyl jastarǵa arnalǵan master-klass dese bolady. Jastar ósip kele jatqan óskeleń mýzykanttarǵa sahnada qalaı óner kórsetý kerektigin kórsetti», - dep málim etti qordan.
Ónerpazdardyń kópshiligi Abaı atyndaǵy opera jáne balet teatrynyń sahnasyna birinshi ret shyǵyp otyr. Jastardyń júrek tolqynysyn basýǵa QR Eńbek sińirgen qaıratkeri, tenor Medet Chotabaev, pıanıst-kontsertmeıster Gaýhar Tasbergenova, sybyzǵyshy Jibek Saparǵalıeva, Qazaqstannyń altyn vıoloncheli Ermek Qurmanaev, QR eńbek sińirgen qaıratkeri, soprano Bıbigúl Januzaq, metstso-soprano Tatıana Vıtsınskaıa, «Astana Operanyń» birinshi skrıpkashysy Qalamqas Jumabaeva kómektesti.
Sonymen qatar, keshte Ahmet Jubanov atyndaǵy mektep-ınternattyń hory jurtshylyqty tánti etti.
