Saýnadaǵy sýdıa: Joǵarǵy sot tekserý qorytyndysymen bólisti
«Sýdıalardy laýazymynan alý jáne tártiptik jaýapkershilikke tartý tártibi «Qazaqstan Respýblıkasynyń sot júıesi jáne sýdıalardyń mártebesi týraly« QR Konstıtýtsııalyq zańymen retteledi. Sýdıalardy teris qylyǵy boıynsha qyzmetinen alý birneshe kezeńmen júzege asyrylady. Birinshiden, naqty jaǵdaı boıynsha Sýdıa ádebi jónindegi komıssııa sýdıa áreketinde Sýdıa ádebi kodeksin buzý faktisiniń bolýy týraly qorytyndy shyǵarýmen tekserý júrgizedi. Tártip buzýshylyq anyqtalǵan jaǵdaıda oblystyq sottyń barlyq sýdıalarynyń qatysýymen ótetin jalpy otyrysta Joǵarǵy sot keńesi janyndaǵy Sot tóreligine sýdıany tártiptik jazaǵa tartý úshin materıaldardy jiberý týraly másele jasyryn daýys berý arqyly sheshiledi», - dedi QR Joǵarǵy soty baspasóz qyzmetiniń jetekshisi Aıdos Sádýaqasov.
Onyń atap ótýinshe, buǵan qosa sýdıa Sot tóreliginiń ózin tártiptik jazaǵa tartý týraly sheshimine qatysty Joǵarǵy sot keńesine shaǵym jasaı alady. Sodan keıin ǵana Joǵarǵy sot keńesi túpkilikti sheshim qabyldaıdy.
«Almaty oblystyq sotynyń Sýdıa ádebi jónindegi komıssııasy Almaty oblysy Kerbulaq aýdandyq sotynyń tóraǵasy D.Seıitovtiń monsha kesheninde bolý faktisine qatysty tekserý júrgizdi. Tekserý materıaldaryn komıssııa qarady. Komıssııa Almaty oblysy Kerbulaq aýdandyq sotynyń tóraǵasy D.Seıitovtiń Sýdıa ádebi kodeksin buzý faktisin anyqtady. Búgingi kúni D.Seıitovke qatysty materıal Almaty oblystyq sotynyń jalpy otyrysynyń qaraýynda jatyr», - dedi Aıdos Sádýaqasov.
Esterińizge sala ketsek, osydan biraz ýaqyt buryn prokýror men sot tóraǵasynyń kásipkermen birigip saýnada demalyp júrgen vıdeosy áleýmettik jelige taraǵan bolatyn. Beınejazbada vıdeony túsirip turǵan avtor óziniń sot tóraǵasymen saýnada demalyp jatqanyn baıandaıdy.