Saýnada tóbeles shyǵarǵan ákim orynbasaryna sot úkimi shyqty
ASTANA. QazAqparat - Pavlodar oblysynda saýnada tóbeles shyǵarǵan aýdan ákiminiń orynbasaryna sot úkimi shyqty, dep habarlaıdy QazAqparat Pavlodar oblystyq sotyna silteme jasap.
Sot derekterine sáıkes, 2016 jyldyń 14 jeltoqsany kúni, saǵat 20.00 shamasynda Pavlodar oblysy Pavlodar aýdany ákiminiń orynbasary saýnada Aýyl sharýashylyǵy qyzmetkerleri kúnin atap ótý kezinde azamat A.-ǵa balaǵat sózder aıtyp, ony keýdesinen ıterip jibergen. Budan keıin ákim orynbasary zardap shegýshiniń basynan judyryqpen birneshe ret uryp jibergen.
«Quqyq buzýshynyń osyndaı áreketi saldarynan densaýlyqqa jeńil zııan keltirildi. Osylaısha, ol Ákimshilik quqyqbuzýshylyq kodeksiniń 73-1 babynyń birinshi bóligi («Sońy densaýlyqtyń qysqa ýaqytqa buzylýyna alyp kelgen densaýlyqqa qasaqana jeńil jaraqat keltirý») boıynsha aıypty dep tanyldy. Oǵan 15 AEK nemese 34 035 teńge kóleminde aıyppul túrindegi jaza taǵaıyndaldy», - dep habarlandy baspasóz málimetinde.
Onymen qosa, tıisti sharalar qoldaný jáne aldaǵy ýaqytta mundaı jaǵdaılarǵa jol bermeý maqsatynda bul aqparat sottyń jeke qaýlysymen Pavlodar aýdany ákiminiń nazaryna jetkizildi.
Aýdan ákiminiń orynbasary taǵaıyndalǵan jazamen kelispeı, apellıatsııaǵa berdi. Alaıda, «Oblystyq sottyń azamattyq ister jónindegi sot alqasy sot qaýlysyn ózgerissiz qaldyrdy, qarsy shaǵym qanaǵattandyrylmady. Sot aktisi zańdy kúshine endi», - dep málim etilgen habarlamada.
