Sáýletshi Á.Tátiǵulov 35 jyldyq shyǵarmashylyǵy men 70 jyldyq mereıtoıyn atap ótýde
ALMATY. Naýryzdyń 19-y. QazAqparat / Ádilet Musahaev / - Búgin Almatyda «KAZGOR» Jobalaý akademııasynyń basshysy Ábdisaǵıt Tátiǵulovtyń 70 jasqa tolý mereıtoıyna arnalǵan saltanatty kesh ótti,
dep habarlaıdy QazAqparat.
Á.Tátiǵulov 1940 jyly 13 naýryzda Qostanaı oblysy, Fedorov aýdany, Traktov aýylynda dúnıege kelgen. Ol Qazaqstannyń sáýlet-qurylys salasy boıynsha ǵana tanymal emes, onyń bedeli halyqaralyq arenada sáýlettik jáne ınjenerlik mektep arqyly da belgili. Professor 270-ke jýyq ǵylymı eńbekter men maqalalar jarııalaǵan. Á.Tátiǵulov QR Sáýletshiler odaǵynyń múshesi, QazKSR eńbegi sińgen sáýletshisi, Qazaq KSR Memlekettik syılyǵynyń laýreaty. Sonymen qatar Eńbek Qyzyl Tý, Qurmet belgisi, Halyqtar dostyǵy, Kurmet ordenderimen marapattalǵan.
«Á.Tátiǵulov - birinshiden joǵary deńgeıdegi bilikti maman. Ol eń kúrdeli jobalyq jumystarǵa mindetti túrde qatysyp, olardyń bolashaq sheshimine ınjenerlik ıdeıalaryn usynyp otyrady», deıdi QR eńbegi sińgen sáýletshi Serik Rústembekov.
Sonymen qatar, atalmysh sáýletshiniń qatysýymen qaladaǵy «Qazaqstan» qonaqúıi, «Alataý» shıpajaı ortalyǵy, QR Ortalyq memlekettik murajaıy, Astanadaǵy Hazret Sultan meshiti, Astanadaǵy Kenesary hannyń, Qostanaıdaǵy A.Baıtursynulynyń eskertkishteri jáne taǵy basqa eńbekter jasalǵan.
Mereıtoı ıesin quttyqtaýǵa týystary, dostary, qyzmettes joldastary, qoǵam, mádenıet qaıratkerleri jáne Parlament depýtattary keldi. Sondaı-aq Elbasy Nursultan Nazarbaev, Premer-Mınıstr Kárim Másimov, QR Parlament Senatynyń tóraǵasy Qasym-Jomart Toqaevtyń atynan quttyqtaý hattar keldi.
