Sáýlet salasyn oǵan múlde qatysy joq azamattar basqaryp otyr - QR qurmetti sáýletshisi

NUR-SULTAN. QazAqparat – Búginde sáýlet salasyn oǵan múlde qatysy joq azamattar basqaryp otyr. Mundaı pikirdi Qazaqstannyń qurmetti sáýletshisi Arqynjan Mámetov bildirdi, dep habarlaıdy QazAqparat tilshisi.

«Ókinishke qaraı, bizdiń elimizde Sáýlet jáne qala qurylysy basqarmalaryn qurylysqa, jalpy bul salaǵa múlde qatysy joq adamdar basqaryp otyr. Sol sebepti, jańadan salynatyn nysandardy turǵyndar úshin qolaıly etý máselesi áli sheshimin tappaı keledi. Bul baǵyttaǵy kásibı uıymdastyrýshylyqtyń jetispeýi - qalalar men eldi mekenderdiń ınfrastrýktýrasyn damytýǵa kedergi bolyp otyr. Kásibı mamandar jasaǵan arhıtektýralyq josparlar is júzinde basqasha oryndalady. Qurylysty naqty júrgizetin kásiporyndar jospardyń jartysynan kóbin qysqartyp tastaıdy. Nátıjesinde mektep, aýrýhana, jaıaý júrginshilerge arnalǵan jol sııaqty qajetti áleýmettik nysandar jetispeıdi», - dep máselelerdi atady Arqynjan Mámetov.

Sondaı-aq, brıfıng barysynda sáýletshi Alekseı Abılov sáýletshilerdiń mártebesi tómendep ketkenin aıtty.

«Búginde sáýletshilerdiń mártebesi tómendep barady. Sáýletshi – úıdiń qasbetterin árleıtin, onyń dızaınyn jasaıtyn adam emes. Ol shyn máninde qala, oblys nemese aýyldyń bolashaǵyn qalyptastyratyn maman. Máselen, ejelgi Mysyrda sáýletshi – perǵaýynnan keıingi laýazymda bolǵan. Al, qazir bul salany kósheden kelgen mamandar basqaryp júr», - dep toqtaldy Alekseı Abılov.

Sonymen qatar, sáýletshi qalanyń bas josparyna baǵynbaǵan qurylys kompanııalaryn jazalaýdy usyndy.