Sáýle Janpeıisova Astanada Óner ortalyǵyn ashady
ASTANA. QazAqparat - Tanymal ánshi, ustaz, Qazaqstannyń eńbek sińirgen qaıratkeri, «Daryn» memlekettik jastar syılyǵynyń laýreaty, fılologııa ǵylymdarynyń kandıdaty Sáýle Janpeıisova Astana tórinen óziniń óner ortalyǵyn ashady.
Bul týraly ánshi QazAqparat tilshisine bergen suhbatynda aıtty.
«Astanadaǵy óner ortalyǵymyz «Amanat» dep atalady. Babalardyń qaldyrǵan amanatyna, ónerine adal bolyp, jalǵastyra bereıik degen maqsatta jáne jastardy tárbıeleý úshin ashyp otyrmyn. Kelemin deýshilerdiń jas mólsherine shekteý qoıylmaıdy. Sebebi ómirde ónerge qoly jetpeı qalǵan adamdar bolady. Nemese jas kezinen-aq dástúrli ánderdi aıtýǵa qyzyǵyp júretinder de kezdesedi. Ózderiniń yntasy, qabileti bolsa, mýzykanyń, ónerdiń qyr-syryn úıretemiz»,- dedi Sáýle Stahanshylqyzy.
Atalǵan ortalyq «Astana saltanaty» turǵyn úı kesheninde ornalasqan. Onda dombyra, qobyz, syrnaı, jetigen aspaptarymen birge qazirgi zamanaýı, álemge tanylǵan fortepıano, baıan, skrıpka, gıtara sııaqty mýzykalyq aspaptar boıynsha dáris beriledi. Sonymen birge ortalyq kontsertter men merekelik is-sharalardy uıymdastyrýdy josparlap otyr.
«Amanat» óner ortalyǵynyń saltanatty ashylýy 15 qazan kúni (saǵat 15:00) ótedi.
