Sáýle Taýdaeva BQO ákimimen dástúrli ándi damytý jóninde áńgimelesti
ORAL. QazAqparat - Búgin oblys ákimi Altaı Kólginov belgili dástúrli ánshi, Qazaqstannyń eńbek sińirgen ártisi Sáýle Taýdaevany qabyldap, qurmet kórsetti, dep habarlaıdy «QazAqparat» tilshisi.
Kezdesýde dástúrli án óneriniń damýy týraly áńgime boldy. Óńir basshysy ánshini alpys jasqa tolýymen quttyqtap, onyń Muhıt pen Ǵarıfolla dástúrin jalǵastyrýshy retindegi eńbegi mol ekendigin atap kórsetti. Aldaǵy ýaqytta da Elbasynyń «Rýhanı jańǵyrý» baǵdarlamasy aıasynda óz ónerin kópke tanytyp, talantty shákirtter tárbıeleı berýine tilektestigin bildirdi.
Aqjaıyq aýdany Taıpaq topyraǵynda ómir esigin ashqan Sáýle Jamanqyzy - óńirdegi Qazaqstannyń eńbek sińirgen ártisi ataǵyn alǵan sanaýly ánshilerdiń biri. 1979-1981 jyly Almatydaǵy respýblıkalyq estrada-tsırk óneri stýdııasynda oqyp, Qazaqstannyń halyq ártisi Ǵarıfolla Qurmanǵalıevtiń klasyn bitirgen Sáýle Taýdaeva 1982 jyldan beri Batys Qazaqstan oblystyq fılarmonııasynyń ánshisi qyzmetin atqaryp keledi. 1996 jyly oǵan Qazaqstannyń eńbek sińirgen ártisi ataǵy berildi. Birneshe ret respýblıkalyq baıqaýlardyń jeńimpazy atanǵan ánshi Qurmanǵazy atyndaǵy mýzyka kolledjiniń Muhıt klasynda dáris berse, qazirgi tańda M.Ótemisov atyndaǵy Batys Qazaqstan memlekettik ýnıversıtetinde ustazdyq etip keledi.
«Batystyń án mektebin qalyptastyrǵan Ǵarıfolla aǵamyzdan qalǵan ónerdi alǵa aparý - bizdiń paryzymyz. Osy oraıda tárbıelegen shákirtterimiz Astanaǵa qosa el óńirlerinde eńbek etip, úmitimizdi aqtaýda. Munyń ózi - ustaz úshin úlken baqyt. Mereıtoıyma oraı arnaıy qabyldap, qurmet kórsetkeni úshin oblys basshysyna rızashylyǵymdy bildiremin», - dedi Sáýle Taýdaeva.
