Sáýle Qısyqova qalada pnevmonııaǵa shaldyqqandar týraly málimet berdi
NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova qalada pnevmonııaǵa shaldyqqandar týraly aıtyp berdi, dep habarlaıdy QazAqparat tilshisi.
«Kúnine koronavırýs ınfektsııasy jáne pnevmonııamen 350-400-ge jýyq adam aýrýhanaǵa jatqyzylady. Juqpaly aýrýlar jáne provızorlyq aýrýhanalarda adamdardyń sany búginde 2,5 myńǵa deıin ósip otyr. Onyń 91 paıyzy ortasha aýyrlyq dárejesinde, 9 paıyzy aýyr jáne óte aýyr. Olar jedel reanımatsııa bólimine birden túsedi. Negizi, sońǵy aptamen salystyrǵanda, naýqastardyń sany úsh esege deıin ósti»,-dedi ol.
Onyń sózine qaraǵanda, osy táýlikte reanımatsııa bóliminde 103 adam jatyr, onyń 51-i koronavırýs ınfektsııasy bolsa, sonyń ishinde 22 adam jasandy tynys alý apparatyna qosylǵan. Ókinishke qaraı, búginde 38 ólim jaǵdaıy tirkeldi. Olardyń 70 paıyzy - 60 jastan asqan adamdar.
«Pnevmonııamen aýyratyn naýqastardyń sany táýligine 600 jaǵdaıǵa deıin ósti. Buryn 80 jaǵdaıǵa deıin bolatyn. Aptasyna 8,5 esege deıin joǵarylaýy baıqalyp otyr. 12 maýsymnan bastap, Nur-Sultan qalasyndaǵy medıtsınalyq uıymdardyń tósek orny qoryn qaıta qurýǵa baılanysty juqpaly jáne provızorlyq aýrýhanalardaǵy tósek orny sany 1351 orynǵa ulǵaıtyldy. Tek sońǵy úsh kúnde qosymsha 830 tósek daıyndaldy. Onyń ishinde búgin Ulttyq ǵylymı medıtsınalyq ortalyqtyń bazasynda taǵy 200 ınfektsııalyq tósek daıyndalady. Sonymen, búginde koronavırýs ınfektsııasymen kúresýge 3 135 tósek oryndyq 12 densaýlyq saqtaý uıymy jumyldyryldy. Qazirgi ýaqytta juqpaly jáne provızorlyq aýrýhanalarda jumys júktemesi 79 paıyzdy qurap otyr», - dedi basqarma basshysy.
