Sáýle Qısyqova elordada karantındi kúsheıtýge qatysty pikir bildirdi
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova elordada karantındi kúsheıtý múmkindigi týraly suraqqa jaýap berdi, dep habarlaıdy QazAqparat tilshisi.
«Búginde karantındi kúsheıtý sharalary negizinen ár óńirdegi epıdemıologııalyq jaǵdaıǵa baılanysty. Shynymen de, Nur-Sultan qalasynda zerthanalyq túrde koronavırýs rastalǵan adamdar sany ósti. Muny elordada koronavırýs ınfektsııasynyń PTR dıagnostıkasyna zertteý júrgizetin 7 zerthana qyzmet etip jatqanymen túsindirýge bolady», - dedi S. Qısyqova «Habar24» arnasyna bergen suhbatynda.
Onyń sózine qaraǵanda, kún saıyn 4-ten 5 myńǵa deıin testileý júrgiziledi.
«Sáıkesinshe, test júrgizý artsa, onda indet juqtyrǵandardy anyqtaý da kóbeıetini túsinikti. Atap ótsek, osy ınfektsııa tabylǵan adamdardyń ishinde 60-70 paıyzynda sımptomsyz dárejede bolady. Sondyqtan epıdemıologııalyq jaǵdaıdy eskere otyryp, karantın sharalaryn kúsheıtý týraly sheshimdi Bas memlekettik sanıtar dárigeri qabyldaıdy», - dedi basqarma basshysy.
