Sáýle Dosjanovanyń «Úlken úıdegi úreı» atty prozalyq kitaby jaryq kórdi
Avtor bul kitabyn 2007 jyldan 2010 jylǵa deıin, ıaǵnı, úsh jyl jazǵanyn aıtady. «Osy «Úlken úıdegi úreıdi» jazýǵa kóp izdený kerek boldy. Bul týyndynyń jazylýyna kezdeısoq oqıǵa sebep boldy. 2005 jyly joldasym Dúkeń (Dúkenbaı Dosjan) ekeýmiz balalardy alyp, Qaraǵandy oblysynyń Qarqaraly aýdanyna demalysqa barǵanbyz. Qarqaraly kentindegi Qunanbaı saldyrǵan meshitte bolyp, esik aldyna shyqqanymyzda, qarama-qarsy bette turǵan úsh qabatty eski úı kózimizge tústi. Sol úıdiń mán-jaıyn surap edim, onyń ózindik tarıhy bar ekenin bildim. Ol HІH ǵasyrda salynǵan dáýletti adamnyń úıi eken»,- deıdi Sáýle Dosjanova. Shaǵyn romanda shytyrman oqıǵalar jelisi oqyrmandy ózine tartyp áketedi. Avtor óz shyǵarmasynda adamnyń asyl qasıetterin baǵalaý qajettigin, al endi bireýge jasalǵan qııanattyń eshqashan ketpeıtinin, ǵasyrlar ótse de, aqıqattyń jaryqqa shyǵatynyn tarıhı kezeńderde bolǵan oqıǵalar arqyly bere bilgen. Osy kitapqa enip otyrǵan ekinshi týyndy - «Jatqa týǵan bala» povesi. Ol qazirgi zamannyń áleýmettik-demografııalyq máselelerin kóteredi. «Adamnyń bir qyzyǵy bala degen» dep Abaı atamyz aıtqandaı, árbir ata-ana sábıli bolǵysy keledi. Alaıda, búgingi zamanda perzent súıe almaıtyndardyń qatary kóbeıip tur. Bul shyǵarmada turmys taýqymetin kóp shekken jannyń qursaq ana (sýrragat-ana) bolyp, ózge otbasyna bala taýyp bergen taǵdyry beınelengen. Jatqa týatyn perzentin toǵyz aı kótergen kezdegi ananyń tolǵanysy atalǵan hıkaıatqa arqaý bolǵan. Bul povestiń jazylýyna qazaqtyń tanymal ǵalym qyzy, Qazaqstandaǵy Birinshi deneden tys uryqtandyrý laboratorııasy - «Ekomed» emhanasynyń jetekshisi, reprodýktolog-embrıolog, bıologııa ǵylymdarynyń doktory Saltanat Berdenqyzy Baıqoshqarovanyń elge sińirip kele jatqan eńbegi úlken áser etti. Osy kitaptaǵy úshinshi týyndy - «Eki kúıeýli áıel» povesi. Qazirgi zamanda bolǵan oqıǵa boıynsha jazylǵan. Kitap avtory ol áıelmen aýrýhanada tanysqan eken. Basty keıipker taǵdyrdyń jazýymen birinshi kúıeýimen ajyrasyp, ekinshi ret turmysqa shyqqan jan. Birinshi joldasy taǵdyr tálkegine túsip, qańǵybas bolyp júrgen jerinen balalary óziniń ákesi bolǵan soń, taýyp ákelip, úıiniń ekinshi jaǵynan esik shyǵaryp, baǵyp, kútedi. Ol áıel: «Ózge jurt soǵan oraı meni eki kúıeýi bar áıel dep aıtady. Biraq men onymen baıaǵyda ajyrasyp ketkenmin. Qazirgi kúıeýimmen bólek turamyn. Men balalarymnyń sonshalyqty meıirimdiligine rızamyn. Kezinde sol ákesi bizge jaqsylyq kórsetpeı, bes balamen meni qańǵytyp jiberip edi»,- dep basynan keshken taǵdyryn baıandap bergen bolatyn. Qalamgerdiń jańa kitaby kópshilik oqyrmanǵa arnalǵan.