Sáýle Aıtpaeva bala zorlyǵy jaıly: Máseleni aıta bergennen júk jeńildemeıdi

ASTANA. QazAqparat - Qazaqstan Respýblıkasynyń Bala quqyqtary jónindegi ýákili Sáýle Aıtpaeva Túrkistan oblysynda zorlanǵan balanyń mektepke barǵanyn aıtyp, «jasy tolmaǵan aıyptylarǵa» qatysty oıyn bildirdi dep habarlaıdy QazAqparat tilshisi.

«Saryaǵash aýdanyndaǵy Abaı selosynda bolǵan jaǵdaıǵa qatysty bir balanyń jasy kelip, qylmystyq jaýapkershilikke tartyldy. Al basqalardyń jastary áli kelmegen (ıaǵnı, qylmystyq jaýapkershilikke tartatyndaı kámelet jasqa tolmaǵan - avt.). Qazir olar baqylaýda júr. Ekinshiden, olardyń ata-analarymen jumys júrgizilip jatyr», - deıdi Sáýle Aıtpaeva Úkimette ótken baspasóz máslıhaty barysynda.

Balalar ombýdsmeniniń aıtýynsha, otbasylyq zorlyq-zombylyq, turmystaǵy zorlyq, seksýaldy sıpattaǵy zorlyq-zombylyq endigári bolmastaı etip jazalaıtyndaı jazany álem áli oılap tappaǵan.

«Olar ózderiniń psıhıkasyn buzý arqyly qazirdiń ózinde jazalanyp otyr. Eń qaharly jaza - ol psıhıkalyq jáne emotsınaldyq jaza. Bul ósý-jetilý barysynda aıqyn kórinetini anyq. Bizdiń Prezıdent balalarymyzǵa mahabbatty bere bilýimiz kerektigin únemi aıtady. Adam balasynyń qolynan keletin eń úlken erligi - unamaıtyn adamǵa boı úıretýi. Olarǵa (balalarǵa - avt.) osy jaı úlken sabaq bolatyndaı, olar naǵyz adam bolyp ketetindeı tárbıeleý kerek», - deıdi Sáýle Aıtpaeva.

«Bala (zardap shekken - avt.) oqyp jatyr. Aıtarym: biz bul máseleni neǵurlym kóp aıta bersek, keltirilgen aýyrlyqtyń júgin jeńildete almaımyz. Sondyqtan, qaı mektepke, qaı synypqa barǵanyn, muǵaliminiń kim ekenin bilsek te, aıtpaımyz», - dep túıdi balalar obsýdsmeni.

Eske sala ketsek, 2018 jyldyń naýryz aıynda Túrkistan oblysynda 7 jasar balany urý jáne zorlaý deregi boıynsha qylmystyq is qozǵalǵan bolatyn. Al osy aıdyń basynda Túrkistan oblysynda kámelet jasqa tolmaǵan balanyń zorlanýy týraly is aıaqtalǵanyn habarlaǵan bolatynbyz.