Sáýle Atyǵaeva: Vırýstan qoryqpaı ómir súrgińiz kelse, eki ret 30 mınýttan qıyńyz
NUR-SULTAN. QazAqparat – Koronavırýs vaktsınatsııasyna qarsylyq bildiretin adamdardy kóbinde farmatsevtıkalyq fırmalar qarjylandyrady. Nur-Sultan qalasynyń Kópbeıindi medıtsınalyq ortalyǵy dırektorynyń orynbasary Sáýle Atyǵaeva osyndaı oı aıtty, dep habarlaıdy QazAqparat tilshisi.
Elorda ákimdigi uıymdastyrǵan «dóńgelek ústel» barysynda Sáýle Atyǵaeva vaktsına alǵan adam men almaǵan adamnyń ómirin salystyryp qaraýdy usyndy.
«Elimizdegi ár adam medıtsınalyq uıymǵa nemese arnaıy pýnktke baryp ómiriniń 30 mınýtyn vaktsına alýǵa bóle alady dep oılaımyn. Óıtkeni bul jumys óte jaqsy pysyqtalǵan. 30 mınýttan artyq ýaqyt shyǵyndamaısyz. Osy 30 mınýttan keıin qalypty alańsyz ómirge oralýǵa bolady. Taǵy 21 kún ótkennen keıin - ekinshi 30 mınýtty qısa boldy. Antıdene osylaı qalyptasady. Vaktsına alǵannan keıin keıbir adamdar aýyrsyný sezinýi múmkin. Biraq mundaı áserler 1-2 kúnnen aspaıdy. ıAǵnı óz densaýlyǵyńyzdy úlken qaterge tikkenshe, vaktsına alǵan áldeqaıda aqylǵa qonymdy», - deıdi maman.
Ol óziniń tájirıbesinde buǵan deıin eki indetpen betpe-bet kelgenin, vaktsınanyń ol indetterdi qalaısha toqtatqanyn baıandap berdi.
«Men muny sizderge 28 jyl eńbek ótili bar ınfektsıonıst dáriger retinde aıtyp otyrmyn. Men 1994-95 jyldary dıfterııanyń órshigenin kórgen adammyn. Ol kezde de túgel otbasylardy kómgenimiz esimde. Medıtsınanyń arqasynda, vaktsınanyń arqasynda ol indetti de jeńgen bolatynbyz. Sodan beri 25 jyl ótti. Dıfterııanyń birde-bir jaǵdaıyn kezdestirgen joqpyn.
Tipti qyzylshaǵa qarsy balalar vaktsınasy bolmaǵan kezdi de kórdik. Vaktsına tabylǵannan beri onyń da órshigenin kórgen joqpyz. Sondyqtan ekpege qarsy adamdardy tyńdaýdyń keregi joq», - degen Sáýle Atyǵaeva vatsınaǵa qarsy úgit-nasıhattyń artynda dári-dármek saýdasynyń lobbıi turýy múmkin degen pikir bildirdi.
«Bálkim olarǵa adamdardyń aýyrǵanyn, kóz jumǵanyn kórý qýanysh syılaıtyn shyǵar. Kóp jaǵdaıda ekpege qarsy adamdardy farmatsevtıkalyq fırmalar qarjylandyratyn bolyp shyǵady. Olarǵa aýrý kóp tarasa, dári shyǵarýǵa múmkindik týady. Aýrýdy anyqtaý úshin dıagnostıka jasaý da tabys kózi bolyp kórinetin shyǵar. 30 mınýt ýaqyt bólip, ómirge senimdi qadam basý durys pa? Álde aman qalýy ekiushty kúıde, kúdikpen ómir surý durys pa? Árkim ózi sheshýi kerek», - dedi dáriger.
Atalǵan sharada Sáýle Atyǵaeva koronavırýstan kóz jumaǵan adamdardyń týystyrynyń basty ókinishin atady.
