Saýl Alvarestiń qutqarýshysy - Adelaıda Berd

ASTANA. QazAqparat - Gennadıı Golovkın men Saýl Alvares arasyndaǵy búgingi jekpe-jekte bir tóreshi 118-110 esebimen jeńisti meksıkalyq boksshyǵa berip qoıǵan. Onyń dál osy sheshimimen jankúıeler de, sarapshylar da kelispeı otyr. Boks keshin uıymdastyrýǵa jaýapty bolǵan "Kanelonyń" promoýteri Oskar De La Hoııa da Adelaıda Berdtiń sheshimine tańqaldym dedi. Bul týraly QazAqparat habarlaıdy.

«Qazir kóbisi 118-110 esebin túsinbeı jatyrmyz deıdi. Men de túsinbedim. Negizi, Adelaıda Berd - kásibı tóreshi. Ol kóptegen tıtýldyq jekpe-jekterge tóreshilik jasaǵan. Qalaı bolǵanda da, 114-114, ıa bolmasa, 115-113 esebin túsinýge bolady. Men ózim "Kanelo" jeti raýndta jeńdi dep sanaımyn. Degenmen, másele onda emes. Eń bastysy, biz tamasha jekpe-jekti uıymdastyra bildik», - dedi De La Hoııa búgingi jekpe-jekten keıingi baspasóz máslıxatynda.

Golovkınniń bapkeri Abel Sanches bolsa, Adelaıda Berd  jekpe-jekke daıyn eseppen keldi dep sanaıdy. "Ókinishke qaraı, tóreshilerdiń bireýi daıyn kartochkamen kele saldy. Menińshe, oǵan qaıtadan mektepke baryp, tóreshiliktiń ne ekenin meńgerý kerek sııaqty. Sonshama soqyr ári biliksiz bolý múmkin emes. Bul - taza ádiletsizdik. Odan boksshylar zardap shegedi", - deıdi Sanches. Promoýter Leffler de túk túsinbeı otyr. "Alvarestiń paıdasyna 10 birdeı raýndty qalaı berýge bolady? Ol esepti qalaı júrgizdi ózi? Degenmen, Gennadıı chempıon bolyp qaldy. Áıtpese, odan da qıyn jaǵdaılar bolady", - dep atap kórsetti Leffler.

Al sarapshylardyń aıtýynsha, búgingi jekpe-jekte eki boksshy emes, bıznes, sonyń ishinde "Goden boy" kompanııasynyń menedjmenti jeńdi. Kóbisi Golovkınge basymdyq berip otyr. Alaıda aldaǵy revansh pen odan túsetin qyrýar paıda úshin Adelaıda Berdty "qurbandyqqa shalýǵa" týra keldi. 

Búginde áleýmettik jelilerde Adelaıda Berttiń sheshimine qatysty narazylyq kóp. Jankúıerler onyń bank esep-shotyna deıin tekserip, tóreshilikten múldem shettetýdi talap etip jatyr. Sebebi buǵan deıin de ol kúdikti sheshim shyǵarǵan edi. Byltyr Lomachenko - Ýolters jekpe-jeginiń uıymdastyrýshylary da ony tóreshilikke qatystyrmaýdy suraǵan bolatyn. Alaıda Nıý-Iork shtaty boıynsha sporttyq komıssııanyń dırektory Bob Bennet eshkimge qaramaı, ony osy joly da qaldyrdy. Endi, Adelaıdamen birge Golovkın-Alvares jekpe-jegin taǵy bir kórip, búgingi sheshimdi túsindirip berýdi talap etpekshi.

Aıta keteıik, búgingi jekpe-jekte bir tóreshi jeńisti Alvareske (118-110) berse, ekinshisi Golovkın (113-115) jeńdi dep sanaıdy. Al úshinshisi 114-114 esebin tirkedi. Álemge tanymal boksshylar bolsa, búgin Golovkın jeńdi dep esepteıdi.