Saýl Alvares Golden Boy jáne DAZN-men kelisimshartyn buzdy

NUR-SULTAN. QazAqparat - Tórt salmaq dárejesindegi álem chempıony Saýl «Kanelo» Alvares (53-1-2,36KO) Golden Boy Promotions promoýterlik kompanııasy jáne DAZN strımıng kompanııasymen jasaǵan kelisimshartyn buzdy, dep habarlaıdy QazAqparat boxingscene.com saıtyna silteme jasap.

Alvarestiń bapkeri Eddı Reınoso áleýmettik jelide sportshynyń budan keıin «Erkin agent» (free agent) ekenin habarlady. Sondaı-aq, Golden Boy Promotions basshysy Oskar de la Hoııa da Kaneloǵa sáttilik tileıtinin jetkizdi.

Aıta keteıik, Saýl Alvares osydan eki aı buryn Golden Boy jáne DAZN kompanııasyn sotqa berip, ýáde etken úlken jekpe-jekterdi uıymdastyrmady dep shaǵymdanǵan edi.

Sportshy sońǵy aıqasyn 2019 jyldyń qarasha aıynda Sergeı Kovalevke qarsy ótkizip, nokaýtpen jeńiske jetken bolatyn.

Meksıkalyq boksshy jartylaı aýyr salmaqta WBO belbeýin jeńip alǵannan keıin sport mansabynda tórtinshi salmaqty baǵyndyryp, Meksıka tarıhyndaǵy uly boksshylar qataryna kirdi.