Sáýirdiń sońynda Almatyda koronavırýstan jazylatyndar sany artady - Ásel Bısenbaeva
ALMATY. QazAqparat – Almaty qalalyq qoǵamdyq densaýlyq saqtaý basqarmasy basshysynyń orynbasary Ásel Bısenbaeva osy aıdyń sońynda koronavırýstan saýyǵyp úıne shyǵatyndardyń sany artatynyn aıtty, dep habarlaıdy QazAqparat tilshisi.
«Búgingi kúni biz dıagnostıkalyq jumystardy zamanaýı zertteý ádisterin qoldana otyryp júrgizemiz. PTR dıagnostıkasy engizilýde, qazirgi ýaqytta bul jumysqa alty zerthana tartylǵan, olardyń ekeýi jekemenshik. Árıne, biz PTR qurylǵylary bar zerthanalardy jumyldyramyz. Osy ádis boıynsha 39 myńnan astam zertteý júrgizildi. Ekspress-dıagnostıka boıynsha 19,5 myńnan astam zertteý jasaldy»,– dedi Jandarbek Bekshın.
Sonymen qatar, ol qalada belsendi túrde dezınfektsııa sharalary júrgizilip jatqanyn atap ótti. Qala boıynsha bir kúnniń ishinde 8 myńnan astam kireberiske, 1300 úı alańdarynda dezınfektsııa júrgizildi. Bul jumystardyń barlyǵyna 458 adam jumyldyryldy. Budan bólek, qorǵanys qyzmetiniń adamdary kóshelerdi, aıaldamalardy, qoǵamdyq oryndardy zalalsyzdandyrýda.
Óz kezeginde, Almaty qalalyq qoǵamdyq densaýlyq saqtaý basqarmasy basshysynyń orynbasary Ásel Bısenbaeva osy aıdyń sońynda indetten saýyǵyp úılerine shyǵatyndardyń sany artatyn tilge tıek etti.
«Almaty qalasy boıynsha indetten 90 adam jazyldy. Naýqastardy jappaı qabyldaý 12 sáýirden bastaldy. Olar mindetti túrde 14 kúndik emdeý kýrsyn qabyldaıdy. Sáýir aıynyń 28-29 kúnderi test nátıjıeleri shyǵady. Soǵan qarap patsıenterdi úıine shyǵaramyz. Jazylǵandardyń sany artady dep kútilýde»,– dedi ol.
